18.11. Unterwegs noch Adelaide

Unterwegs uf de Great Ocean Road

 

Am Samstig Morge früe bini mitem Bus vode OZ Experience abgfahre im Zentrum vo Melbourne. De Bus isch dasmol volle gsi und zwor mit sehr viele Dütsche, es par Engländer, me Österricher, me Spanier, me Italiener, zwei Däne, und mir.

 

Noch churzer Fahrt händ mir en Stop gmacht in Torquay, det sind die berühmte australische Labels wie Oaklay, Billabong, Quicksilver, Rip Curl dihai und händ ihri Outlets. Also en churze Shopping Stop chönt er säge isches gsi. Han aber nüt kauft will günstiger als sus isches nid gsi dete und min Koffer quillt sus scho fast übere vor luter Zügs.

 

Bereits churzi Zit spöter isch die Great Ocean Road losgange. Berühmt isch sie vor allem weg de Twelve Apostles, das sind die Felse wo eifach zmitzt im Meer stönd. Das isch eso, will s Wasser det extrem aggressivi Wirbel und Welle bildet und somit rund ume die ganze Felse abtreit hät. Irgendwenn werded somit au die letste verblibende Felse verschwunde si, si werded aifach weggspüelt... Die sind über Kilometer de Küste entlang verteilt. Mir händ s Glück gha, dass s Wetter zwor sehr schlecht gsi isch aber defür s Liecht umso besser usgse hät und d Fotene super worde sind. Lueged das a, fantastisch, nid?

En Regeboge häts plötzlich au no geh, fast glichzitig mitem Sunneundergang.. En Traum!

Links de Arch und rechts die berühmti London Bridge, am zweite Tag am Morge. Di letste vode Apostles Richtig Adelaide... Bitzeli spöter isch denn die Great Ocean Road au scho wider fertig gsi.

Übernachtet händ mir denn uf halbem Weg vode Great Ocean Road ime Hostel wo mir für üs älai gha händ. A dem Obig bini denn leider chrank worde, das heisst han mich denn de ganzi zweiti Tag nid soo toll gfühlt. Das isch eigentlich undertriebe aber jedefalls hani denn d Wanderig verpasst wo am Nomitag uf de Pinnacle gmacht worde isch. Vo det hät mer s ganze Tal chöne überblicke. Bin denn lieber ide Underkunft bliebe, das isch zmitzt im Grampians National Park gsi und vieli wildi Tier sind umegschliche wie Känguruhs, Emus und so witer.

 

Noch eme verloschlofne Tag und ere ziemlich erholsame Nacht hani denn am Mäntig wider ales mitmacht. Mir sind zerst zum McKenzie Wasserfall, und am Nomitag häts ä Chlettertour ge uf en ziemlich grosse Hügel bzw Berg, was aber widerum mit ere geniale Ussicht über de Grampians Park belohnt worde isch. Isch übriges wider warm gsi, und usserdem isch det Schlangegebiet, chönt also die Eastern Brown Snake ha und anderi wo zude giftigste vode Welt zehled. Zum Glück häts aber kein Zwüschefall geh.

Spot am Obig sind mir denn in Adelaide acho. A dem Tag isch denn gar nix me gloffe wie immer noch dene Toure. Churz go ässe, und denn is Bett. Allerdings hani denn mit es par us de gliche Reisegruppe für de nögsti Tag was ganz speziells plant und buechet: E Wine-Testing-Tour im Barossa Valley, wo die beste und berühmtiste Wi vo ganz Australie herchömed. Witer gohts im nögste Bericht.