21.11. Adelaide - Seite 2

Adelaide

 

Am Mittwoch han ich mir Zit gno zums Stadtzentrum vo Adelaide aluege. Mis Hostel isch grad nebem Zentrum und z Fuess han ich nur 10 Minute bis det. Au so isch Adelaide ziemlich e überschaubari Stadt, es git do nid so ä Skyline wie in Brisbane, Sydney, Melbourne oder Gold Coast.

 

Die Stadt isch i quadratischi Strosse ufteilt, mer würd also meine dass d Orientierig sehr eifach müessti si. Isch si aber nid! Es gset ales ziemlich glich us und mer hät überhaupt kei hochi Gebäude zum sich orientiere.

 

Komisch isch no, dass es do nur wenigi Strosse im Zentrum hät womer chan go shoppe, oder ässe. Und wemer mol e Shoppingstross gfunde hät, denn häts det kei Restaurants oder Pubs. Die sind nämlich inere andere Stross. Isch also würklich ALES i dere Stadt ufteilt und plant.

Defür häts mehreri Dutzend Chile im Stadtzentum wo sehr schön usgsend...

Nochdem ich s Zentrum eimol umrundet han han ich mich denn uf de Weg gmacht no e Stross witer z laufe im Norde. Det isch nämlich de Botanischi Garte vo Adelaide, und de isch absolut genial! Itritt choschtets au do keine, und es git sehr viel Sache z gse...  Zum Bispiel all die Wintergärte wo mittedrin stönd, det sind überall sehr selteni und schön azluegendi Pflanze drin. I de künstliche Teich vom garte händ sich wildi Ente agsidlet.

Mini nögsti Station nochem Botanische Garte isch s Regierierigszentrum mit de Denkmäler und Musee gsi, wo au recht interessant gsi sind.

So, das wärs jetzt us Adelaide. Die Stadt isch zwor gross mit 1.2 Millione, aber doch irgendwie kai richtigi Metropole. Am Obig am 9ni sind d Strosse do scho leer und einsam.

 

Gester Fritig Obig isch ä Usnahm gsi, det isch nämlich d Adelaide Classic gsi i de Innestadt. Das isch e Autoshow mit alte und neue Sportwage. Det häns also zmitzt ide Stadt die super Autos uf d Stross gstellt womer hät chöne aluege. Das hani super gfunde, nur leider hani d Kamera nid debi gha will i nur was han wöle ässe noch mim Kangaroo Island Usflug.

 

Über de Usflug hani ime eigne Ordner berichtet.... Lueged det dri, d Bilder sind super worde.