26.11. Kuala Lumpur - Seite 4

Sooo, min letste Tag isch abroche in Kuala Lumpur, de Dunnstig. A dem Tag hani no es par Sache vor gha, woni unbedingt no han wele gseh. Do drunder isch als Ersts am Morge d Istana Budaya gsi, s Nationaltheater. S Gebäude isch riesig und uffällig, vergliche chamers vilicht mitem Operehus in Sydney. Mir hät das sehr guet gfalle det, nur d Lag isch nid so optimal gsi, wit vom Stadtzentrum entfernt.

Aber riiiiesegross, das hani do uf de Petronas Towers Brugg entdeckt gha und gsait: Do mues ich ane!

Ine gange bini denn natürlch au, will d Türe isch offe gsi. Im Innere isch das Gebäude sehr schön gstaltet und supermodern. Han denn Musig ghört im obere Stock und bin churz go luege... Det isch en Typ vor ere Glastüre gstande und hät grad gmerkt dass ich interessiert bin. Sofort häter mir denn erklärt, dass das Lüt vom Nationaltheater sind wo e Uffüärig vome traditionelle Tanztheater üebed.

Die sind ali extrem nett gsi und händ sich gfreut dass ich mich interessiere. Innert 5 Minute bini denn also drin gsässe zmitzt i dene Akteure und han ziemlich lang zuegluegt was die so tüend de ganz Tag :-)   Bin scho sehr überrascht gsi über die Gastfründlichkeit und das Interesse wo die Malaysier a Fremde händ. Es isch es sehr speziells Erlebnis gsi, do zuezluege wo ich sicher nid so schnell vergesse wird.

Mini nögst Location woni han wele go aluege isch denn no Kampung Baru gsi, das isch eigentlich de Punkt ide Stadt wo am längste besiedlet isch. Bin dur sehr alti und teils nid soo schöni Strosse gloffe. Es isch aber interessant gsi, au de Teil vo de Stadt z gseh. I dene Strosse bini ungefähr ä Stund umegloffe bis ich denn en Weg zunere Hauptstross gfunde han. In Kampung Baru häts nämlich kei Taxis oder Monorail Haltestelle, somit isches recht schwer wider usezcho.

Defür hani vo dem Stadtteil her en super Usblick uf d Petronas Towers gha! De isch übrigens sehr schwer z finde, will die Gebäude ide Stadt ali so nöch zäme stönd. Und wemer mol en Punkt gfunde hät zum Fötele stönd die Türm ganz sicher hinderenand, und nid nebenand...

I han mir mit allem sehr Zit loh a dem Tag will mich s Taxi erst am 4ri isch cho abhole fü de Flughafe. Isch de glich Fahrer gsi womi scho vom Flughafe brocht hät, mit ihm hani en guete Pris usghandlet gha und er isch en agnehme gsi, was sehr vo Vorteil isch bi sonere lange Fahrt, nämlich 1.5 Stund bis zum Kl LCC.

Noch ere Wartezit vo 2 Stund nochem ichecke isch denn min A320 vode Air Asia abghobe, wider Richtig Singapur. Ich bin denn froh gsi wo ich im Singapur Flughafe no churz was Znacht übercho han und de Transport zum Hotel vode Singapore Airlines organisiert gsi isch. Mis Hotel dasmol isch leider s Link Hotel im Süde vom Zentrum. Ziemlich usserhalb vo allem... Naja und s Zimmer isch halt scho au nid ganz so schön wie in Kuala Lumpur, aber das hani au nid ganz erwartet. Gschlofe hani au eso, bin totmüed gsi.

Soooo das isch also scho wider de letsti Stop vo minere Reis, bevors denn bereits am Suntig Richtig haizue goht. Voher hani aber no en 13 Stündige Flug vor mir, woruf ich mich überhaupt nid freue. Aber Hauptsach wider hai!