Malaysia

Samichlaus, 6. Dezember 2005 / Kuala Lumpur
 
Nachdem mier in Phuket praktisch jede Tag Rege gha haend, haet doch d'Sunne a eusem Abreisetag alles gaeh, de Himmel isch stahlblau und wolkenlos gsi. Naja, so haemmer wenigstens die beste Vorussetzige fuer de Flug uf Kuala Lumpur gha und haend so d'Region um Phuket und d'Kueste no wunderbar vo de Luft us choenne bestuune.
 
Ufm knapp 70km lange Weg vom Flughafe Kuala Lumpur id Stadt hemmer vom Taxi us sogar scho d'Petronas Twin Towers und en chline Teil vo de Stadt gseh. Haet eus guet gfalle und mier haend eus uf Ahieb grad wohlgfuehlt. Churz nachm ichecke im Hotel simmer daenn au grad loszoge und eifach mal ohni Ziel umegloffe. Also besser gseit, Thomas voller Tatedrang vorus, Petra schwitzend und chuechend hindenah ;-)  Ploetzli simmer ide Noechi vom KL-Tower (drittgroeschti Fernsehturm uf de Welt) ufm Bukit Nanas xi. Bukit Nanas heisst uebrigens Ananas-Huegel. Also simmer um de Huegel umegloffe und uf de Turm ufe. Det obe haet eus e wunderbari Ussicht ueber die ganzi Stadt erwartet. Da mier churz vorm Idunkle dete acho sind, haemmer au no grad d'Skyline bi Nacht choenne bestuune. Nachdem mer laengeri Ziit uf dem Turm obe gsi sind, haemmer daenn gfunde, dass mier no s'Wahrzeiche vo de Stadt wend goge aluege, die 452m hoechi Petronas Twin Towers. Vom Fernsehturm us haend mier die zwar in noechschter Noechi gseh, aber direkt devor stah haemmer huet au no welle. 
Gesagt getan. Wenn mer vor dene riesige Towers staht, fuehlt mer sich scho chli winzig....  Isch aber unglaublich idruecklich!
 
Ufm Weg zrugg is Hotel (wo im Chinatown glaege ische) simmer no gschwind bim chinesische Nightmarket go verbiluege und chli goge umestoebered und haend eus nachher entschiede, dass mier werded es Auto miete und so chli Malaysia aluege. I dene wenige Stund i dem Land fuehled mier eus scho sehr wohl und haend s'Gfuehl, dass da Luet no einigermasse "gesittet" Auto fahre tuend. Mier werdets gseh...
 
 

9. Dezember 2005 / via Cameron Highlands uf de Insle Penang acho
 
Nach de Formalitaete betr. Automieti ischs daenn losgange. Thomas isch gfahre und Petra haet glueged, dass er uf de richtige Strassesiite bliebt. Schono speziell, de Linksverkehr. Zudem simmer immer wieder am Schiebewuesche anstatt am blinke ;-)
Mier haend de Weg us de Stadt use relativ guet gfunde und sind dann nach knapp 4,5h fahre i de Cameron Highlands acho. Die letschte 60km haets ziemlich fescht gregnet, die guet usbaute Pass-Strasse haend sich teilwies in chlini Fluess verwandled und mier haend daenn in Ringlet (ca. 15km vorm Ziel) mal aghalte, will mer vor luuter Rege fascht noed haend choenne fahre. Wills aber i luut Reisefueher i dene Highlands viel regned - noed nume ide Regeziit- unds allgemein recht fuecht isch, haend mier eus wegem Wetter kei Sorge gmacht.
Nachdem mier daenn in Tanah Rata acho sind und endlich es Hotel gfunde haend (es haet sich usegstellt, dass d'Petra fuer de dritti Reise-Level "Dreck" nonig ganz bereit isch), simmer chli goge de Ort aluege. Wills aber immer no gregnet haet unds ziemlich chuel gsi isch, simmer relativ schnell ines indisches Restaurant ghoeckled und dete fuer die naeschte Stunde au bliebe.
Bi de Balkontuer vo eusem Hotel haets uebrigens kei Feisterglas gha. D'Tuere haet lediglich us Holz und "nuet" bestande. Drum ischs au ide Nacht i eusem Zimmer recht chuehl gsi. Mier haend aber e Duschi mit Warmwasser gha und so haemmer eus am naechschte Morge tiptop choenne ufwarme, bevors am halbi nueni uf en gfuehrte Usflug gange isch.
Bi dem Usflug haend mir de landschaftlichi Hoehepunkt vo de Cameron Highlands choenne gseh, Teeplantage. Die Plantage fuelled ganzi Taeler und gsehnd us wie en riesige, gruene Plueschteppich. Natuerlich hemmer au d'Teefabrik vo de Firma Boh bsuecht und erkennt, wie simpel de bekanntischti Tee vo Malaysia hergstellt wird. Nach es paar Tasse heissem Tee, zwuescheziitlich haet sogar d'Sunne bitsli gschunne, ischs wiiter gange uf euse persoenlichi Hoehepunkt: e Dschungelwanderig. Links und rechts vom sogenannte "Weg" hochi Pflanze, Baeum, teilwies bunti Blueme. Sehr schoene Moosbewuchs a de Baeum, wunderbari Rundumsicht uf de Wald allgemein. Sehr idruecklich isch das Erlebnis gsi, mier haend viel ueber de Regewald erfahre und sind debi au recht dreckig worde (vorallem Petra, wo mal e halbi Sekunde noed ufpasst haet wo sie anetramped und deshalb usgrutscht und ufm schlammige Bode glanded isch) und leider viel z'schnell wieder verbi gange. Leider haend mier kei Ziit meh gha, zum laenger bliebe und nomal so e Wanderig zmache.
Bald scho ischs naemlich wiiter gange ad Kueste abe uf d'Insle Pengang. Dete simmer daenn 2 Naecht bliebe und haend die ganzi Insle umfahre, sind e Fruitfarm go aluege, mitm Schwiizer-Zahnradbahn uf de Pengang Hill ufe und haend de Hauptort Georgetown chli noecher aglueged. Georgetown wird uebrigens vorallem vo Chinese und Inder praegt. Leider haemmer uf de Insle noed choenne bade, aber mier haend die Ziit dete trotzdem gnosse, bevor mer daenn wieder ufs Festland und suedlich de Thai-Grenze entlang uf die ander Siite vo Malaysia gfahre sind.
De beschti isch aber no gsi, grad nachdem mer vo de Faehre Pengang-Butterworth weggfahre sind, haemmer en Wegwiiser entdeckt mit dem Ort wo mier anemuend. Ok, simmer dete uf d'Autobahn und haend Gas gaeh. Komischerwiis isch eus ploetzli en Autofahrer ufm Pannestreife entgaege cho, und au es paar Toefflifahrer. Mier haend daenn erscht verstande um was es gaht, wo mier vor eus e Abschrankig gseh haend: fertig Autobahn. Gaht nueme wiiter. Da haet mer eifach no choenne umchehre und uf de lingge Spur wieder retour fahre.
 

12. Dezember 2005 / ade Ostkueste acho 
 
Die knapp 6stuendigi Reis haet eus ueber de landschaftlich reizvolli East-West-Highway dur de Regewald, vorbi ame grosse See und satte, gruene Felder und durch chlini Doerfli gfuehrt. Vorbi a Chueh wo zmitzt uf de Strass umestande sind, a vielne Huehner und Gaens (wos scho dunkel gsi isch haemmer 1x muesse ahalte, will "es Rudel Gaens" zmitzt uf de Strass umegwatschled isch), und a Warnschilder wo drufstande isch, "beware of Elephants".
 
Erschoepft aber sehr beidruckt vo dere Fahrt, simmer ade Ostkueschte im Ort Kota Bahru acho. Ziemlich schnell haemmer e huebschi Unterkunft gfunde und sind no oeppis feins goge Znacht esse.
 
Kota Bahru isch mit ca. 200'000 Iwohner de Hauptort vom Sultanat Kelantan und liegt ame Fluss wo im Meer muendet. I dem Ort haet eus vorallem de sehenswerti Zentralmarkt ime 3stoeckige Gebaeude beidruckt. Dete haets nebed Fruecht und Gmues au Fleisch, Fisch und verschiedeni Handwerksprodukt und vor allem ganz viel traditionelli Chleider zum chaufe gaeh. Mit mine blonde Haar und ohni Chopftuech bin ich mier i dem grosse Markt-Gebaeude scho ziemlich fremd vor cho. Isch aber sehr interessant z'erfahre, wie vor allem allgemein d'Chind uf eus Uslaender reagiered. Meistens luegets eus eifach mal a, ziemlich direkt. Wenn mier daenn die Chind tuent alache oder dene tuend zuewinke, chunnt sofort oeppis retour. Es fruendlichs "hellooooo", es Lache oder au es Winke.

Bald druf abe simmer wieder is Auto gstiege und a kilometerlange Straend mit malaiische Fischerdoerfer und chline Unterkuenft unter Kokospalme verbi gfahre. Euses naeschti Ziel haemmer vor Ibruch vode Dunkelheit noed erreicht, aber mier haend mit Cherating e tolli alternative gfunde. Dete simmer naemlich zuefaellig anes Ressort anecho wo sogar no offe gsi isch (waehrend em Monsun hat ade Ostkueschte  sehr viele gschlosse) und mier daenn au grad 2 Naecht bliebe sind. Mier haend dete s'erschti Mal ganz offiziell en ganze Tag nume gfulenzt und sind en Tag eifach am Pool glaege,. Herrlich gsi!
 

14. Dezember 2005 / retour in KL, ufm Weg nach Melaka


Frisch erholt simmer vo Cherating us via Genting Highlands wieder retour uf Kuala Lumpur gfahre, will mier dete ja mit de Sabi abgmacht haend. Mier haend es paar tolli Taeg z'dritte verbracht, haend viel glached, fein g'aesse, chli Bierli trunke und sind goge shoppe gange. Mier haend wuerkli Freud gha, haet das mitm Treffe gklapped und haend mier so viel Ziit choenne mitenand verbringe!

Nachdem mier s'Sabi verabschieded haend, sind mier no en Tag in KL bliebe und haend eus chli uf d'Wiiterreis vorbereitet, haend em Lake Garden en mehrstuendige Bsuech abgstattet. De Park isch eine vo de grosse Attraktione, befindet sich zmitzt ide Stadt ine und beinhaltet nebed eme Orchidee-Garte au e grossi Hybiscus-Alag. Es git sogar i dem grosse Park ine en riesige See (haemmer leider noed gfunde), en Vogelpark und freilebendi Affe. Waeri noed ploetzlich es grosses Gwitter uftaucht und hetted sich d'Wolke noed grad ueberem grosse Park entleert (das chan guet vorcho, dass es am einte Ort regnet und es Quartier nebeddra isch und bliebt alles troche), waehred mier vermuetli no laenger dete bliebe.

Mitm Zug ischs daenn innerhalb vo 2h nach Melaka bzw. uf Tapin und vo dete us mitm Taxi uf Melaka gange. In Melaka haemmer recht Mueh gha, e Unterkunft zfinde wo no oeppis frei gsi isch. Thomas haet sich daenn mal mitm Reisefuehrer uf de Weg gmacht, waehrend dem d'Petra bim Hauptplatz inere Bar ghoeckled isch und ufs Gepaeck ufpasst haet. Isch e gueti Entscheidig gsi: bald scho haet de Thomas fuer knapp CHF 10.-/Pers. es chlises, suubers Chinese-Guesthouse gfunde wo mier eus daenn fuer 2 Naecht iquartier haend.

De Ort selber haet eus au wieder sehr guet gfalle, vieli chlini bunti Hueser, es herzigs China-Town, en schoene Fluss, im Zentrum vieli bunti Trishaws und fruendlichi Mensche. Mier haend eus wohl gfuehlt und es paar Sache choenne aluege. De einzigi Schock isch fuer d'Petra gsi, wo sie am Sunntig ufm Hauptplatz zmitzt i de Luet ine e wiisi Boa uf de Schultere vome Tourischt gseh haet. Ui, sie isch bockstill gstande, haet nueme welle wiiterlaufe und vor luuter Schreck sogar keis Wort meh usebracht (und das isch also wuerkli sehr selte). En Trishaw-Fahrer haet eus beobachtet, grinst und gseit "oh yes, the snake". Mier haend noed useghoert ob er snake oder snakes gseit haet... us Sicherheitsgruende haet Petra welle en Umweg mache und spoeter haemmer daenn festgstellt, dass es snakeS gsi sind, haet 2 Boas dete gha....   Sind aber total harmlos gsi die Tier, und so im Delirium, dass sogar d'Chind mitene "gspielt" haend... Fuer euse Gschmack ziemlichi Tierquaelerei. Doch fuer vieli Tourischte halt glich e Attraktion.