Singapur

19.-23. Dezember 2005 
 
Sodeli, mier sind in Singapur acho!
 
Vo Melaka us haemmer de Bus nach Joho Bahru muesse naeh (direkt nach Singapur sind alli scho usbueched gsi, und das am Morge am halbi elfi). Mier sind also zerscht in 170er-Bus igstiege und nach ca. 2h mitm Gepaeck usgstiege, haend eus en Usreisestempfel gholt und sind i d'Warteschlange zum nechschte 170er-Bus agstande; "eusi" Bus isch wiitergfahre. Mitm naeschte Bus simmer daenn bis zur malaiische Grenze gfahre, wieder mitm Gepaeck usgstiege, haend e Immigrationcard usgfuelt, d'Iireise/ und Zollformalitaete durlaufe und sind daenn nomal uf de Bus. De haet eus daenn zmitz id Stadt Singapur inegfahre.

De erschti Tag hammer grad mit City-Besichtigung verbracht. Es git in Singapur so en CityBuzz wo sehr guenstig isch, de fahrt uf 3 Linie und mer chann ueberall ine-bzw. usegumpe. Geniali Sach das. So haend mier d'Quartier City, little India und Chinatown chli choenne aluege und sind bim Esplanade-Park daenn laenger hocke bliebe, haend Sushi gaesse und eifach chli d'Stadt uf eus wirke lah. Am fruehne Abig haemmer eus daenn entschiede, e Rundfahrt mitm Boot zmache und so de Hafe und die vorglagerete Insle vo Singapur choenne gseh. Isch unglaublich romantisch gsi, noed nume wegm Sunneuntergang. D'Pianomusig haet gstumme, d'Stimmig ufm Meer usse und die farbige Liechtli ufm Boot. Haet eifach alles zeme passt.

Die wiitere Taeg haemmer daenn mit viel spaziere und umelaufe durch die verschiedenige Quartier und Huegel, mit ere Besichtigung i de BattleBox (enere Art Bunker wo d'Entscheidig zum Kriegsendi Japan gaege Malaysia/Singapur ide 40er Jahr gfalle isch) und eme Bsuech im NightZoo verbracht. De Abig isch total faszinierend gsi. Wege de freiumelaufende Tier haemmer kei Bilder chonne mache i dem NightZoo, da drum de Link fuer alli wos interessiert www.nightsafari.com.sg
 
Mier haend i dere Safari daenn no e knapp 30minuetigi Show "Creatures of the Night" aglueged. Waschbaere, Hyaene, Nightowls etc.  Dummerwiis au da wieder en Rieseschock fuer d'Petra. Da das Ganze churz zemegfasst:
Zmitzt ide Show isch en Zueschauer ufgstande und d'Asagerin haet festgstellt, dass de sini Fruendin verlore haet. Sini Fruendin isch irgend es Tier gsi, wo muen zwuesched em Publikum ume si. Das Tier segi um die 10m lang... Petra isch scho ufm Sprung gsi... (zum Glueck simmer grad ide Noechi vonere Staege ghocked). Uf jedefall sind daenn es paar Zueschauer ufgstande und d'Asagerin haet gseh, dass die alli ufere Chischte obesitzed. De Typ wo sini Fruendin gsuecht und natuerli zu de Show ghoert haet, macht d'Chischte uf und holt e lebendigi Boa fuere. D'Luet rundume kreisched uf...  Er haet sich daenn das Tier um de Koerper umegwickled und isch uf d'Buehne demit. Nachdem alli Zueschauer wieder uf de Sitz gsi sind, haet sich en Freiwillige daenn doerfe die Schlange, wo uebrigens Maggie gheisse haet, um de Koerper wickle und gspuere, dass sie ebe warm und troche isch und noed so glitschig wie vieli Luet das vo dene Tier meined.

Abgseh vo dem chline, schockierende Erlebnis isch de NightZoo es wunderbars Erlebnis gsi. Glichziitig interessant, wunderschoen und au chli gfuerchig, wills liecht gregnet haet, natuerlich dunkel gsi isch und natuerli rundume Raegewald. Mier sind vieles au z'Fuess ufme spezielle Pfad abgloffe. Rund ume us ume Lions, Elefante, Bueffel, Rhynos, Hippos, Woelf, Tiger, Leoparde.
 
Singapur selber haet eus mit de grosse Shoppingmeile Orchard Road, de guete Organisation, de suubere Weg, Strasse und Laede beidruckt und eus mit de wunderschoen kitschige Wiehnachtsbeluechtig, de schoene Wiehnachtsbaeum und de Wiehnachtsmusig chli choenne Wiehnachtsstimmig anezaubere.