AU - Western Australia / Perth

8. Januar 2006 / Akunft in Perth und Rundreis

Sodeli, jetzt sind mier bereits es paar Taeg in Perth und haend scho einiges choenne gseh.
Im Flueger uf Perth isch es Paerli vor eus gsaesse und irgendwie simmer in Kontakt cho. S'Agebot vo de Teri und em John, eus mitznaeh und direkt is Motel z'fahre, haemmer noed choenne ablehne... Das isch doch scho en tolle Start in es neus Land gsi! ;-)
Mier haend zwar gwuesst, dass d'Ireis uf Australie bitsli anderscht isch als suscht amigs am Flughafe, aber dass grad so vieles und so gnau dursuecht wird, haemmer noed gwusst. Mier haend eusi Trekkingschueh muesse zum Rucksack ushole, eifach zur Kontrolle, wegm Dreck wo hetti choenne dra si. Es isch strictly forbidden, irgendwelchi Essware, Pflanze, Tier etc. is Land iizfuehre. Es isch aber alles guet gloffe und mier haend daenn nach de Passkontrolle uf eusi neu Bekanntschaft gwartet (sie sind vonere churze Weltreis zrugg cho und haend in Sri Lanka Holzfigure poschtet; die haend natuerli muesse verzollt und entsprechend beguetachtet werde).
Mier haend beidi vom erschte Augeblick wo mier in Perth gsi sind, s'Gfuehl gha, wow, da gfallts eus, da fuehled mier eus wohl! De allererschti Iidruck haet sich nume bestaetiget. Mer sind eifach gluecklich gsi, womer zum erschte Mal ide Fuessgaengerzone vo de Stadt flaniert sind und d'Atmosphaere ufgsoge haend.
Bald haemmer eus daenn mit em "Perth-Tram" en erschte Ueberblick ueber de Ort verschafft, sind in wunderschoene KingsPark und haend eus eifach superwohl gfuehlt.
 
Wenigi Taeg spoeter ischs daenn scho losgange mit eusem Mietauto Richtig Suede.
De erschti Hoehepunkt isch gsi, wo mier haend choenne uf de Penguin Island underme Felse 3 chlini Pingus und au no e (leider verletzti) Robbe gseh. Die Insle isch fuer d'Tourischte nume via Holzsteg begehbar. D'Insle ghoert de Pinguine, de Voegel und de Echse wo dete lebed und isch en Art Naturreservat.

Es chunnt no aber no besser:
im zweitgroeschte Stadtgebiet vo Westaustralie, in Bunbury, ca. 180km suedlich vo Perth, haemmer bi de Koombana Bay en Usflug mitm Boot gmacht und Delfine choenne gseh! Es isch eifach total es schoens Gfuehl, die Tier choenne gseh i ihrer natuerliche Umgebig. Und daenn au no ohni dass es vo de Mensche gfuettered und durch das as Tourischte-Boot aglockt werded! Mier haend in Florida vo wiitem mal es paar Delfine gseh, aber isch halt immer wieder total schoen! Womer daenn an Strand retour sind, haemmer gseh, dass en andere Delfin bis uf ca. 2m am Strand gsi isch und sich vo de Bsuecher dete haet bestuune lah...
 
Nach dem idrueckliche Delfin-Erlebnis simmer wiitergfahre nach Busselton und sind dete ufm knapp 2km lange Holzsteg is Meer usegloffe und vo det us is Ocean Observatory,e Art Aquarium wo mer bis an Meeresgrund abe haet choenne gah. Wunderschoen, und das alles ohni nass z'werde ;-)

12. Januar 2006 / Kaengis und Baumwipfel
 
Ui, was isch das fuer en Tag gsi fuer d'Petra!
Agfange haets mit em Bsuech im Glouchester Nationalpark, dete isch d'Hauptattraktion en ca. 60m hoeche Baum womer chan mittels Metallstange bestiege. De Thomas isch natuerlich det ufe und haet vo de Baumchrone us choenne ueber s'grueni Dach vom Nationalpark luege. De Petra isch das natuerli viel z'hoech gsi, sie haet dune gwartet und chli die viele bunte Voegel (Papageie oder Kakadus, mier kenned d'Unterschied no zwenig....) gfoeteled.

Wiiters ischs daenn zum Walpol-Nornalup Nationalpark gange, gnauer zu de Attraktion Valley of the Giants. De Name seits doch scho, noed? Das isch dete d'Heimat vo vier sehr seltene Eukalyptus-Baeum, die einte sind wege ihrer Groessi und em Umfang bsunders beidruckend. Auf em Tree Top Walk, enere 600m lange Stahlkonstruktion, spaziert mer daenn in luftiger Hoechi (bis zu 40m ueber em Bode!) zwuesched de Baumwipfel umenand. Am Afang haet sich d'Petra no relativ wohl gfuehlt, wo's daenn aber immer hoecher und gwaggeliger worde isch, sind au ihri Bei au immer gwaggeliger worde. Aber zum Glueck hats es hoechs Glaender gha, wo sie sich haet choenne festhebe, und de Thomas isch zur seelische Unterstuetzig ja au no ume gsi ;-) Ihm haet de Walk natuerli sehr guet gfalle, so au de Claudia und em Felix, womer churz vorher kenneglernt haend. Irgendwaenn simmer daenn alli wieder uf sicherem Erdbode gsi und haend mitenand de Wald us de gwohnte Perspektive aglueged und sind chli go spaziere. Vor luuter schwaetze und verzehle (die beide sind sit 2 Moenet in Australie und vorher 2 Moenet in Neuseeland bzw. 1 Monat uf Hawai gsi --> alles no Destinatione wo bi eus ufm Plan stoehnd), ischs daenn halt chli laenger gange. Mier nachher no mitenand d'Kaenguruh-Station vo de Lesly aglueged, sie tuet verletzti Kaengis ufnaeh und durefuettere bis es wieder i die frei Natur usechoend. Echt herzig die Tier!

Leider haend sich d'Weg vo de Claudia und em Felix und eus scho wieder trennt, und mier sind wiiter i die Richtig wo sie her cho sind. Das isch via Williams Bay und Elephant Rocks bzw. Natural Bridge nach Albany. Uf dem Weg haemmer daenn au s'erschti Mal d'Kaengis gseh, sind grad ide Noechi vonere Strass umegumped ;-)  So haet d'Petra nachm "Hoeheschock" ufm Tree Top Walk, bi de Elephant Rocks und de Natural Bridge (e riesigi Steibrugg wo Klippe tuet mienand verbinde. Wiit unde dra nuet als tossendi Welle) doch no en schoene Abschluss gha vo dem Tag....

17. Januar 2006 / bald wieder retour in Perth
 
Mier sind scho bereits wieder i de Noechi vo Perth und haend uf eusere Rundreis bis jetzt wunderschoeni Erlebnis gha:
 
In Albany, wo mier uebrigens s'erschti Mal wegm Raege, em Wind und de 15 Grad Tagestemperature richtig chalt gha haend (vor allem d'Petra), simmer es Walmuseum go aluege und haend dete viel ueber die interessanti und doch au truurigi Aglegeheit erfahre.
 
Via de sogenannti Weizenguertel (Weatbelt), enere heisse und trochene Halbwuesti westlich vo Perth, simmer daenn de Wave Rock go bestuune. Das isch e 100m langi Felsewelle wo Teil vonere Felsformation isch (de befindet sich ca. 350km suedosestlich vo Perth). Sie haet a dere Stell - ebe bim sogenannte Wave Rock- durch Erosion ihri spezielli Form uebercho. Dete simmer au no chli go wandere und haend daenn irgendwenn muesse umchere, will mer eus verirrt haend. Und mer haend ja keis Risiko welle igah, so um die unbekannti Gegend und irgendwelche Tierli ume. Bitsli spoeter simmer daenn ufm Richtig Pfad gsi, de haet eus in ca. 1,5h zu mehrere ustroechnete Salzsee gfuehrt. Es isch unglaublich heiss und troche gsi, zum Glueck haend mier gnueg Wasser und eusi Kopfbedeckige debi gha. Ja, uf dere Wanderig haend mier daenn nomal Kaengis gseh, viel noecher als die vo de Strass us. Mier haend sogar choenne es Foti knipse, bevor beid mitenand daenn furtgumped sind. Nume scho wege dene beide Kaengis haet sich de Walk glohnt!
 
Natuerlich haend mier au im Nambung National Park die bekannte Kalksteisuele "Pinnacles" alueged. Die Pinnacles-Wuesti isch liecht gwellt und usm Bode choemmed unzaehligi, ca. en halbe bis vier Meter hoechi Felsnadle use. Die Rueh (es haet praktisch kei Tourischte ume gha), die Waermi, die Felse und die spezielli Stimmig a dem Ort haet eus ziemlich beidruckt.
 
Bis jetzt haemmer immer Glueck gha mitm finde vonere Uebernachtigsmoeglichkeit, bis uf huet Abig. Nach es paarmal verfahre, nach umeirre und mit viel Glueck (da gits doch tatsaechlich ade Westkueschte und DEM Strandparadis vo Perth praktisch kei Unterkuenft! Klar, mier hetted uf Perth ine choenne, haemmer aber nonig welle) haemmer defuer jetzt es wunderschoens Zimmer zume super Priis, sogar miteme Balkon und mit Meeressicht! Da druf laht sich de herrlichi Sunneuntergang ueberem Meer bestens gnuesse! Zur Feier des Tages und will mer scho ziemli erschoepft gsi sind, haemmer bim Pizzakurier euse Znacht is Zimmer bstellt.

 
20. Januar 2006
 
Mier sind jetzt unterdesse bereits wieder i eusere neue Lieblingsstadt acho und haend no chli Ziit, zums da gnuesse, es paar Sache erledige und eus seelisch uf euse Abschied vo Westaustralie vorzbereite.
 
Uebrigens, mier haend ja no e chlini Panne gha bim Auto: uf ere unsealed road isch eus en sogenannte Roadtrain, en riiiiiiesige Lastwage, entgaege cho. De Thomas isch natuerli uf d'Siite usegfahre und haet praktisch aghaltet. Aber trotzdem: uf eusere Frontschiebe haets dank eme Stei, wos vo de Gschwindigkeit vo dem Roadtrain ufgwirblet haet, es chlises Loch gha. Us dem Loch isch daenn mit de Taeg en groessere Sprung quer ueber d'Schiebe worde. Tja, haet eus grad euses Auto-Depot gchoschtet. Natuerli simmer gaege das noed versichered gsi.
 
Da in Perth simmer no ame schoene See gsi, mier haend ganz vieli schwarzi Schwaen (Wappezeiche vo Perth) und Pelikane gseh!

22. Januar 2006 / Last days
 
Euse letschti Tag in Perth!
Mier haend de verbracht mit spaziere ide City, haend em schoene KingsPark nomal en Bsuech abgstattet, sind no mal chli go Sightseeing mache mit de oeffentliche Verkehrsmittel (gratis!) vo de Stadt und als kroenende Abschluss hemmer eus es Znachtesse im Drehrestaurant goennt! Isch e super Ussicht gsi, natuerli 360 Grad ueber die ganzi Stadt. De schoeni Sunneuntergang haet grad no dezuepasst und eus de Abschied noed eifach gmacht. Am 21.45h isch eus de Bus vorm Motel goge abhole und haet eus an Flughafe bracht.
 
Ufm Weg det ane haemmer beidi nomal die tolli und erlebnisriichi Ziit da in Westaustralie Revue passiere lah, unter anderem natuerli au eusi gestrigi Bsuech uf de Rottnest Island:
 
mier sind am Morge mitm Boot uf die flachi, sandigi Insle, wo nume ca. 11km lang und 4,5km breit isch und bekannt isch fuer die chliine Beuteltier "Quokkas" wo nume dete vorchoemmed. Zerscht ischs ufm Swan River nach Fremantle gange, dete sind 2 bekannti Gsichter igstiege: Claudia und de Felix! Luschtige Zuefall gsi, dass mier eus da nomal troffe haend. Sie sind zwuescheziitlich fascht am Endi vo ihrer 5-monatige Reis und haend no en schoene Ort vor sich: Perth.
Uf  Rottnest acho, ischs daenn mit de gmietete Velos (mit 3 Gaeng, bim einte Velo haend 2 devo funktioniert) los gange. Mier sind det uf de ganze Insle umekurvt und haend eus au mal  schneewiise Sandstraend gleit und chli d'Ziit gnosse. Natuerli haemmer au es paar Quokkas gseh, das sind so chlini Tier wo de Kaengurus gliched.
 
Ja, und scho simmer am Flughafe. De Flueger bringt eus zerscht uf Sydney und vo dete gahts daenn uf Christchurch, Neuseeland. Mier haend e supertolli Ziit gha im Weste vo Australie und sind fascht bitsli trurig, muemer Perth verlah.
 
Uebrigens:
Die ganz ufmerksame Leser haends bestimmt gmerkt: mier haend euse Ufenthalt in Westaustralie verlaengered und euse Flug ab Perth um 1 Wuche verschobe. Schnell hemmer gmerkt, dass mer eifach meh Ziit bruched zum eus da im groeschte Territorium vom Land chli umeluege. Natuerli hetted mer no laenger choenne bliebe, und au no in Norde vo WA reise (zum Biispiel nach Broome, oder no in Karijini NP, oder au "nume" die 1000km ab Perth bis nach Monkey Mia, Delfine go aluege). Aber da mier noed z'viel vom neuseelaendische Summer wend verpasse, haemmer gfunde, ei Wuche Flug verschiebe isch grad ok. Tja, mier sind gluecklich haet das mitm umbueche klapped - isch zerscht chli dumm gloffe, will s'Reisebuero da noed so haet welle wie mier- und jetzt gahts ab in es neus Abentuer, Neuseeland!