Neuseeland (Suedinsle)

K I A   O R A  

(Maori fuer "willkomme")

23.-26. Jan. 2006 / Christchurch

Nachhere astrengende aber doch guete Reis simmer in Christchurch acho. Da gschwind eusi Reiseziite: Perth-Sydney 4h / Sydney 3h Ufenthalt / Sydney-Christchurch 3,5h / Airportufenthalt (inkl. Schuehkontrolle wegm allfaellige Dreck) und Transport is Motel ca. 1,5h. Mitere Ziitverschiebig vo 5h isch das doch ziemli en lange Weg gsi und eus beidne sind am Abig im italienische Reschti schier d'Auge zue gheit. Es isch eus daenn aber ufgfalle, dass bereits nueni am Abig isch und dusse d'Sunne no schiint. Wenn da nume noed de chalti Wind gsi waeri... De Thomas haet gmeint "da mueni mir glaubs mal en Pulli chaufe", und wenn de Thomas chalt haet, heisst das oeppis. D'Petra isch natuerli scho im Fasi umegloffe ;-)
 
Am erschte Tag hemmer grad mal ziemli lang gschlafe, haend ja dank eusere "Reise-Nacht" es ziemlichs Schlafmanko gha. Nacheme chline Lunch i eusem Zimmer haemmer daenn es Velo gmietet und sind uf d'Sueche nach de Campervermietig womer ufm Weg vom Flughafe is Motel gseh haend. Nach ca. 1,5h fahre simmer dete acho und daenn au mal det bliebe fuer die naechschte paar Stunde. Obwohl das quasi e Hauptvermietig gsi isch mit 3 Toechterfirmene, isch das gar noed so eifach gsi. Urspruenglich hemmer ja plant gha, ab NZ nume no mitm Camper umereise. Das haet sich daenn aber in Christchurch als eher schwierig usegstellt und mier haend absolut kei Moeglichkeit gha, en Camper fuer 3 Wuche Suedinsle z'miete (i eusere 2. Wuche haets naemli bi allne 3 Firmene kein einzige Camper meh zur Verfuegig gha). De Thomas haet daenn gmeint, mier choenged au d'Suedinsle mitm Auto mache und de Norde mitm Camper. So  haets daenn au klapped. Eso het sich wenigschtens d'Sach mitm Autotransport uf de Faehe vo de einte Insle zur andere erlediged. Das choschtet naemli ziemlich viel fuer es Fahrzueg.
Will die Auto-/Campervermietig au in Australie (inkl. Tasmanie) schaffe tuet haend mir mit dene en grosse Deal choenne mache und durch das ziemli Geld gsparrt. Jetzt hemmer also fuer d'Suedinsle es Auto, fuer d'Nordinsle en Camper. Daenn flueged mer uf Adelaide und vo dete us uf Tasmanie. Det haemmer daenn es Auto. Retour in Adelaide werded mer fuer de reschtlichi Australieufenthalt en Camper ha.
Die ganzi Buechig haet natuerli jenschti Aenderige bzw. wiiteri Buechige i.S. Zug, Motel, Faehre und Flueg (zB. de Flug vo Adelaide uf Hobart-Tasmanie) mit sich bracht. Mier haend welle direkt vo Auckland uf Hobart reise. Aber die entsprechendi Aenderig hetti meh gchoschtet als de Umweg via Adelaide und en separate Flug uf Hobart. Daenn hemmer no muesse de Zug vo Christchurch uf Picton bueche und natuerli d'Faehre. Isch grad chli Arbet gsi das alles. Aber alles i allem haets daenn guet klapped und mir haend nach verschiedenige Abklaerige en Tag spoeter d'Autos und eusi Camper definitive bueched.
 
Natuerli hend mier noed nume eusi Ziit bi de Vermietig in Christchurch verbracht, sondern au de Ort echli aglueged. Da haend mier zum Biispiel e Fahrt mitm Citytram gmacht und einiges ueber die chlini Stadt erfahre, sin dim Stadtpark umespaziert und haend dete chli neuseelaendischi Luft gschnuppered. De Thomas isch no uf d'Kathedrale ufe waehrend dem d'Petra i dere Ziit paar langi Trainerhose und en duenne Pulli go poschte isch (de wo sie mitgno haet, isch dummerwiis in Kuala Lumpur verlore gange).
Mier sind mit de Gondle uf de Huusberg "Mount Cavendish", 945m, und haend so e wunderbari Ussicht uf d'Stadt und uf die vulkanische Erhebige vo Banks Peninsula gha. S'Wetter isch aber z'wenig guet gsi, dass mer haend choenne die Neuseelaendische Alpe gseh.  
 
Bevors daenn uf Suedinsle-Entdeckig gange isch, simmer no is International Antarctic Center. Das isch e sehr interessants Usstelligszentrum und zeigt viel ueber d'Gschicht vom Engagement Neuseelands I de Antarktis (die meischte Flueg det ane werded vo Christchurch us gstartet). Mier haend dete ime spezielle Ruum en Sturm mituebercho, und haend doch tatsaechlich im Schnee gfrore. Haend eus chli gfuehlt wie diheime ;-)  En Ride uf de Haegglunds haet natuerli noed doerfe faehle. Das sind 5 Tonne schweri Raupefahrzueg mit Ketteatrieb.

27. - 29. Jan 2006 / Kuesteort Akaroa und Zwergpinguine in Oamaru
 
Nachdem mier eus in Christchurch ziemlich verfahre haend, hemmer daenn doch no de richtige Weg us em Ort use gfunde. Mier haend Banks Peninsula (e Halbinsle) via Summit Road durch Buchte und Kraterrand nach Akaroa gno und haend immer wieder verschiedeni Stopps igleit, um die schoeni Umgebig z'gnuesse. Nach chline Startschwierigkeite vo de Petra ("es isch mier eifach z'chalt da. Knapp 15 Grad Temperaturunterschied innerhalb wenige Taeg isch noed luschtig. Und zudem gsehts wuerklich us wie ide Schwiiz") fuehlt sie sich in Neuseeland zwuescheziitlich sehr wohl und freut sich druf, das Land z'entdecke.  
 
De huebisch Kuesteort in landschaftlich schoener Umgebig befindet sich ca. 85km vo Christchurch entfernt am Ufer vome Naturhafe. De Ort haet es franzoesisches Ambiente und zuegt devo, dass die erschte Siedler da us Frankriich gsi sind. Bewiis sind gwuessi Bauwerk, franzoesischi Restaurants und au franzoesischi Strassenaeme.
Wills eus da so gfalle haet, haend eus spontan beschlosse, da z'uebernachte. Das Zimmer wo mier uebercho haend, haet sogar 2 Ruem, es eigets Schlafzimmer  und e wunderschoeni Sicht uf de Akaroa Harbour. De Abig haemmer daenn ime Pub usklinge lah. 
 
Mir haend beidi superguet gschlafe und sind am Morge trotz eme chline Zwueschefall total erholt ufgwacht.
Mir sind daenn em Meer entlang spaziert und haend dete bi de Pier e Bootstour bueched und durch das d'Region no chli noecher kenneglernt. Mier haend debi uf dere Tour Seals gseh und au no die seltene Hektordelphine. Die jedoch nume vo wiit weg. Und vo no chli wiiter weg hemmer zum erschte Mal en Pinguin gseh, er isch im Wasser gschwumme und nume de Chopf haet useglueged.Am nechschte Tag hemmer e Bootstour bueched und durch das d'Region no chli noecher kenneglernt. Mier haend debi uf dere Tour Seals gseh und au no die seltene Hektordelphine. Die jedoch nume vo wiit weg. Und vo no chli wiiter weg hemmer zum erschte Mal en Pinguin gseh, er isch im Wasser gschwumme und nume de Chopf haet useglueged.

Aja, ihr waend sicher no vom chline Zwueschefall ide Nacht lese, noed? Also: um die halbi foifi am Morge stoend mir beidi fascht im Bett (kei Seich) will mier dur en merkwuerdige Ton verusse gweckt worde sind. Fuer eus isch das e Sirene gsi. Wasseralarm. Total luut. Mier direkt am Meer, kei Ahnig wie wo was. Super. Das chunnt noed guet. I de Stube vorne hemmer welle de TV ischalte, aber de isch noed gange. Radio hemmer keine gha und verusse isch absoluti Stilli gsi, kei nervoesi Luet am umerenne, nume de grelli "Sirene-Ton". D'Petra haet daenn eifach gschnell de Fuerwehr agluege und gfroeged, was da los segi. De Typ haet eus beid choenne beruehige, sini Antwort isch naemli gsi "there must be a fire somewhere". Super, simmer bi de Fuerwehr grad richtig gsi. Tja, jetzt wuessed mier wenigstens wie e Fuer-Sirene in Neuseeland toent ;-)

Wiiters isch daenn de Kueschte entlang richtig Suede gange. Oamaru isch euses naechschti Ziel gsi. Ufm Weg det ane haemmer ganz vieli Oldsmobile gseh und eus gfroeged, was echt das fuer en Alass isch. Im Ort acho haemmer zerscht mal Problem gha zum es Zimmer z'finde. Zum Glueck simmer daenn doch no fuendig worde und haend daenn defuer e Suite mit 2 Schlafzimmer muesse naeh. Vom Priis her ischs a eusere obere Grenze gsi, aber mier haend ja au noed welle uf de Strass schlafe. Fuer die naechschti Nacht haemmer daenn es guenstigers Zimmer uebercho. Wills Wuchenendi isch und es Renne mit Oldtimer ide Noechi stattfindet, sind praktisch alli Motels incl. Backpackers usbueched. Aber mier haend ja nomal Glueck gha.
 
Oamaru isch bekannt fuer die beide Pinguinkolonie bitsli usserhalb vom Ort. Mier haend natuerli die Glegeheit zur Beobachtig vo de winzige Zwergpinguine und de groessere Verwandte, Gelbauge-pinguine, wahr gno und sind drum am Abig grad zum Visitor Center gange. Die haend eus de Weg zur einte Kolonie erklaert und grad rechtziitig haemmer no es Ticket verwuetscht. Churz nach de achte haemmer uf de Holztribune am Endi vomene Kiesweg grad binere Bucht Platz gno (natuerli ipackt i warme Chleider) und gwartet, bis die erschte Pingus vom Meer her choemmed und i ihri Bruethuesli goend. S'Warte haet sich glohnt: um die halbi zaehni isch die erschti Gruppe gstrandet, die steili Kueschte duruf und ueber de Weg zur Wiese gwatschlet. Das isch daenn es herzigs Erlebnis. Natuerli sind daenn no viel meh cho, mier haend so ungefaehr 130 Zwergpinguine choenne gseh, es haet au es paar jungi drunder gha.
 
Am naechschte Tag haemmer daenn no euses Glueck bi de Gelbaugepinguine versuecht, die wohned ame Strand au chli usserhalb vo Oamaru. Leider haemmer det kei Glueck gha, aber s'Erlebnis vo de andere Pingus haet eus immer no Freud gmacht!
 
Am Morge haemmer no gschwind mit eusem Auto id Garage muesse: irgendwas mit de Bremse isch noed in Ordnig gsi, s'Laempli haet immer ufgluechtet und bim bremse haets so komisch toent. Zum Glueck isch daenn aber nuet ernschthafts gsi und mier haend bald wieder choenne wiiter fahre.

 
30.-31. Jan. 2006 / Albatross, Seals und Pingus
 
Zwuescheziitlich haemmer 2 Taeg in Dunedin verbracht und mit eusem Usflug uf d'Halbinsle Otago es tolls Erlebnis gha. Mier sind miteme 8-raedrige Wage vo Natural Wonders ueber Stock und Stei gfahre und durch das a einsami Straend und a Plaetzli mit wunderbarer Ussicht ueber d'Kueschte und entsprechend as Wildlife vor Ort cho. Haend so Glaegeheit gha, nomal ganz vieli Seals z'gseh (sind ufm Weg nach Dunedin bim Shag Point verbi cho und dete haets "tonnenweise" so Tier gha) und au vo wiit weg no en Gelbaugepinguin. De haemmer aber nume mitm Feldstecher choenne erkenne und au nume will eus de Guide uf das Tier higwise haet. Mier haend total Glueck gha mitm Wetter: am Vormittag isch bewoelkt, recht chalt und sehr windig gsi. Chum sind mier uf die Tour, haets ufta und mier haend super Wetter gha.
 
Nach dem Usflug simmer no is Albatross Center und haend dete viel ueber die Voegel glernt. Otago Peninsula isch uebrigens eine vo de seltenschte Ort wo die Tier  a Land tuend bruete. Au da isch s'Wetter no guet gsi, aber es haet wieder unglaublich fescht gwindet. So fescht, dass d'Petra chumm haet choenne grad stah und dass es durch de Wind s'Autotuere zuetaetscht haet. Fuer d'Voegel isch das aber ideals Flugwetter (die gleitet im Wind) und vo dem her isch das daenn au fuer eus genial gsi.
 
Zwei wunderschoeni Taeg mit einmalige Tier-Erlebnis in Dunedin goend z'End und mier mached eus uf de Weg nach Invercargill, vo wo us mier wend die dritti neuseelaendischi Insle erkunde.

1.-5. Februar 2006 / Usflug mitm Flug nach Stewart Island, Fjord Milford Sound
 
Vo Dunedin us simmer wiiter Richtig Suede nach  Invercargill gfahre und haend zwuescheddure natuerli immer wieder aghalte, mier sind chli go wandere und haend unter anderem de unberuehrti Catlins Forest Park durchquert. Catlins Coast beeinhaltet einigi vo de urspruenglichschte Landschafte vo Neuseeland, drum lebed vorallem da mehreri selteni Saeugetier- und Vogelarte. Ide Catlins hemmer steili Klippe, windigi Landspitze, wiisi Sandstraend, Felsbuchte und Wasserfaell choenne gseh. Verbunde mitere churze Wanderig haemmer am Nugget Point, enere felsigi Landspitze, Pelzrobbe mit ihrne Junge beobachtet, nachher simmer zu de Purakaunui Falls witer, eine vo de meistfotografierte Wasserfaell. Nugget Point isch uebrigens eine vo de weltwiit einzige Paarigsort ufm Festland fuer Elefanterobbe. Will mier die verschiedenige Robbearte nonig guet choend usenand halte, sind mier noed sicher, die Tier wuerkli au gseh haend.
Vo de Curio Bay us ischs zerscht ufere ca. 16km lange, ungeteerte Strasse und daenn ueber e riesigi Schafweid zum Slope Point gange. Das isch de suedlichschti Punkt vo de neuseelaendische Suedinsle. Es Schild zeigt d'Entfernig zum Suedpol und em Aequator.
 
In Invercargill acho haemmer daenn mal euses Zimmer bezoge und sind Esse go poschte. Mier sind chli spaht dra gsi (obwohl es paar grossi foodshops teilwiis bis Mitternacht offe haend) und haend drum im Lade ide Brotabteilig kei Toastbrot meh gfunde. Simmer also ziemlich enttuescht gsi. Ploetzli bueged mier zume Gstell ab und haend oeppe es 20m langi Toastbroat-Gstell vor eus!! Sowas haemmer also nume grad vo Amerika her kennt. Bi 15 verschiedenige Toastbrot-Sorte haet d'Petra ufghoert zehle und daenn eifach es Pack is Choerbli tue. Mer muen wuesse, da z'Neuseeland gits kei Brot, wie mers vo de Schwiiz bzw. Europa her kennt. D'Luet da ernaehred sich vorallem vo Toastbrot, defuer gits das i tuusig verschiedenige Variante. Ami-Style halt ;-)
 
Wills im Flueger vo Invercargill nach Stewart Island fuer de naechschti Tag kei Platz meh gha haet, hemmer halt eus no en Tag laenger Ziit gno fuer Invercargill und sind am uebernaechschte Tag am Morge frueh an Flughafe gfahre. Am achti isch euse Flueger los gange. Ganzi 8 Persone, inclusive Pilot, haend i some Mini-Flugi Platz gha. Mier sind beidi zum erschte Mal mit some chine Ding gfloge (das bim Fallschirmspringe damals in San Diego isch chli groesser gsi), entsprechend Spass dra haend mir gha. Vorallem de Thomas, er haet grad nebedem Pilot choenne sitze!
Uf de Insle acho, ischs grad wiiters miteme Wasserboat uf Ulva Island. Chumm simmer dete gsi, haets afange regne. Und die naeschte Stund au noed ufghoert. Simmer halt chli im Raege umegspaziert und haend so chli d'Insle aglueged. D'Petra isch nach 2h bis uf d'Huut klitschnass gsi und haets nueme so toll gfunde. Retour uf Stewart, simmer eus ime Reschti goge troechne, haend dete fein gaesse und ploetzlich isch d'Sunne fuerecho! Herrlich, so haemmer wenigstens die groesseri Insle no bi super Wetter choenne gnuesse.
 
Bald scho ischs wiiter gange zum Fiordland National Park. In Te Anau hemmer bi strahlendem Sunneschii und blauem Himmel gfunde, mier muessed wiedermal chli Velo fahre und haend es Tandem gmietet. Scho chli gwoehnigsbeduerftig, vorallem fuer d'Petra wo hinde ghocked isch und noed gseh haet, wo de Thomas anestuered ;-)
 
Nachhere luschtige Fahrt em schoene See entlang simmer no goge Minigolf spiele und bald scho go Znacht esse. Danach ischs mitm Schiff uf die anderi Seesiite gange und dete haemmer d'Glowwormcaves aluege. Das isch e Hoehli wo nume mit chline Boot und via Metallsteg zuegaenglich gmacht worde isch. Ganz s'hinderscht hinde, natuerli bi vollkommener Dunkelheit, haet mers daenn choenne gseh, die viele luechtende Gluehwuerm. Faszinierend gsi!
 
Am naechschte Morge hemmer daenn de Weg nach Milford Sound under eusi Raeder gno. De Milford Sound isch 16km lang und de noerdlichschti vo 14 Fjord im Fjordland-Nationalpark (1'200'000 Hektare gross) uf de Suedinsle. D'Oeffnig zum tasmanische Meer hi isch ca. 550m breit. D'Bootsfahrt ufm Fjord haet eus sehr beeidruckt. Die spezielle Farbe vom Meer, de Himmel, d'Berge rundume und daenn no d'Wasserfaell, das alles haet eus richtig verzaubered!
  

5.-8. Februar 2006 / Farmstay bi de Petra und em Dirk
 
Via Te Anau ischs daenn am gliche Tag nach Dipton gange, wo mier d'Petra und de Dirk uf ihrer Farm haend doerfe bsueche. Die beide sind sit 10 bzw. 4 Jahr in Neuseeland. E zuefaelligi Internetbekanntschaft mit de Schwoeschter vo de Petra haet das moeglich gmacht und so sind mier uf de Farm acho und herzlich ufgno worde. Mier haend dete doerfe 3 Naecht im Nachbarshuus wohne und durch euse Ufenhalt viel ueber de neuseelaendischi Buurebetrieb lerne.
D'Farm isch 475ha gross und beinhaltet 2 Melchstaell und total ca. 1'300 Chueh. Ziemli viel. Wenn mer doch bedenkt, dass alli Chueh muend jewiils am Morge frueh und mitti Namittag gmolche werde. Mier haend natuerli au doerfe chli im Melchstall mithelfe. Will grad en Milchtescht agseit gsi isch am naechschte Tag, hemmer d'Melchutensilie putzt und gschrubbt. Am Namittag haemmer daenn bim melche so Milchbecher wo mit Milch gfuehlt gsi sind, usgwechsled. Am Inhalt vo dene Becher haet mer erkennt, wieviel Milch jedi einzelni vo dene ca. 1'300 Chueh git. Die Becher hemmer daenn fuers Labor parat gstellt. Die werded dete gnauschtens uf de Milchinhalt kontrolliert. Isch noed ganz eifach, dass korrekt z'erklaere. Hoffentlich verstoehnd ihr einigermasse, um was es da gange isch.
 
De Thomas haet daenn am naechschte Morge am foifi bis am halbi zaehni nomal en Isatzt gha im Stall, bevors daenn Mitti Namittag wiiters gange und euse Farmstay bereits beendet gsi isch. Mier haend es paar schoeni und vorallem sehr interessanti Stunde bi de Petra und em Dirk gha. Es isch eifach laessig gsi, mit ihne ide Stube z'hoeckle und plaudere, z'lache und au chli ueber ihres Lebe in Neuseeland bzw. als diaryfarmer z'erfahre.
 
Mier probiered ja immer am 5. vom Monat, eusem Abreisetag in Zuerich-Klote, in es schwiizer Restaurant goge esse z'gah. Das haet dasmal noed klapped. Defuer simmer bi Schwiizer (sorry Dirk!) ufere neuseelaendische Farm gsi und haend u.a. seeeehr feins Brot, wo de Dirk selber bached haet, uebercho! ;-)
 

***************************************************
Sodeli, das isch jetzt grad echli viel gsi. Aber so chunnts halt use, wenn mer sich fascht 3 Wuche nueme in A.... klemmt und sich anesetzt zum schriebe... ;-)
 
Mier hoffed, eui Neugier uf Reisebricht isch bis zum naechschte Mal befriediged und ihr haend eu choenne churzwiilig d'Ziit vertriebe.
 
Cheers und bis zum naechschte Mal!
Bis dahin freued mier eus, vo eu per Mail z'erfahre, was bi EU alles so abgaht ;o)

***************************************************
 
 

9./10. Februar 2006 / Touristestadt Queenstown, rassigi Fahrt ufm Fluss
 
Nach eusem interessante Ufenthalt bi de Petra und em Dirk ischs wiiter via Queenstown gange, DIE Tourischtestadt vo Neuseeland und de Inbegriff fuer Freiziit. I de Prospekt wird de Ort teilwiis sogar als "St. Moritz vo Neuseeland" abote.
Ibettet inere faszinierende Bergwelt, romantisch aglehnt an blaue See Lake Wakatipu, das isch s'erschte Bild gsi wo mier vo Queenstown uebercho haend. Bald hemmer gmerkt, dass mier die Qual der Wahl haend betreffend Freiziitagebot: Bungee Jumping, Swining (aehnlich wie Bungee Jumping, eifach noed ame Gummiseil ufe und abe schwinge, sondern hin und her pendle), White Water Rafting, Canyoning, Shotoverjet, Mountainbike, Riite, Drache fluege, Felsklettere, Parasailing, Usflug mit de Gondle uf de Berg Bob's Peak, Kiwi & Birdlife Park, undundund.
Mier haend eus daenn fuer e rassanti Jetboat-Fahrt ufm Shotover Canyon ca. 5km noerdlich vo Queenstown, entschiede. Wow, das isch en megatolle Ride gsi! Mit bis zu 80kmh simmer knapp 40 Min. ueber de Fluss gfaeget (teilwiis simmer nume knapp 5cm im Wasser gsi mitm Boot). Kuuli Drehige um die eigeti Achs und teilwiis absichtlichi Duschene vom Fahrer her haend eus immer wieder ziemli nass gmacht. Aber es isch es einmaligs Erlebnis und en unglaubliche Adrenalinkick gsi!
Da und da grad nomal gits Foeteli vo eus!

Eusne Nerve und em Budget z'lieb hemmer eus spoeter daenn no fuer e bitsli ruhigeri und guenstigeri Attraktion entschiede: e Fahrt mit de Skyline Gondola uf de Bob's Peak ufe. s'Wetter isch perfekt gsi und obe ufm Spitz haet eus e einmaligi Ussicht ueber de See, die umliegende Berge und natuerli de Ort erwartet. Mier sind det obe chli go wandere und haend d'Ziit gnosse.
 
Am naechschte Morge simmer nomal chli go laufe und in Kiwi & Birdlife Park, ganz i de Noechi vo eusere Campingunterkunft. Dete haemmer doch tatsaechlich 4 Kiwis gseh! De nachtaktivi National-Vogel vo Neuseeland isch weltberuehmt. Er isch de einzigi Vogel uf de Welt, wo ohni sichtbare Fluegel uschunnt und demzufolge noed fluege chan. Leider gits en nume no sehr selte (vorallem d'Bueteltier Possum sind schuld a de Selteheit vo dene Tier) und mer chan en facht noed gseh. Mier haend total Freud gha, haend mir d'Glegeheit gha, das Tier z'beobachte (wenns au ime Park und noed ide freie Natur gsi isch).
 
Wiiters ischs Richtig Westkueste gange. Nach 2h fahre simmer bi Wanaka is Museum "Puzzling Word" und haend eus ade Kuriositaete det ine schieff glached. Zwuescheziitlich ischs Abig am sechsi gsi und mier hetted no knapp 2,5h bis 3h Fahrziit gha zum ad Westkueschte abezcho. Drum haend mier eus entschiede, in Wanaka z'uebernachte. Gar noed so eifach gsi, bi de chline Schwoeschter vo Queenstown es freis Zimmer zfinde um die Ziit. Zum Glueck haet eus daenn en nette Herr vome Motel gholfe und fuer eus e Budget Accomodation gfunde. Chli usserhalb hemmer daenn inere Art Backpacker-Motel eusi Nacht verbracht und sind, will mer en lange Weg vor eus gha haend, am naechschte Morge frueh wiiter gfahre.

11.-13. Februar 2006/ Gletscher ade Westkueste und Sunneschii in Nelson
 
Via tuefgruenem und ueppigem Regewald simmer vom eher trochnige Grasland her ad Westkueste vo de Suedinsle gfahre und haend debi e neui, wunderbari Gegend mit spezielle Berge / Huegel doerfe gseh.
 
Acho im Westland Nationalpark, hemmer eus uf e churzi Wanderig gmacht und sind de Fox-Gacier goge aluege. Nachdem mer verschiedeni chlini Fluess ueberquert und ueber Stock und Stei gloffe sind, simmer daenn devor gstande. Idruecklich, aber fuer eus Schwiizer isch so en Gletschter doch nuet neus. 25 km wiiter ischs daenn zum chli groessere, 12km lange Gletscher, Franz Josef Glacier gange. Det simmer zerscht ufme Pfad durch es Stuck Regewald und daenn ca. 6km quer durchs Kiesbett zum Gletschtertor gloffe. Spannend a dem Gletscher isch, dass er bis fascht an Regewald anechunnt und i de letschte Jahre immer wieder wachse tuet. Er haet zuescheziitlich wieder sin Standpunkt vo 1965 erreicht.
 
Wiiter Richtig Norde, in Hokitika, hemmer daenn eusi naechschti  Nacht verbracht und am Abig no en wunderschoene, knallige Regeboge choenne gseh. Isch en schoene Abschluss vome tolle Tag gsi.
 
Ufm Weg nach Nelson hemmer im Paparoa Nationalpark no die spezielli Felsformation vo de Pancake Rock besichtiged.  s'Wasser haet im Lau f vo de Jahr Millione spektakulaeri Loecher in verwitterti Kalkstei grabe. Durch die Loecher schuesst s'Wasser bi Flut ziemli gschwind wie e riesigi Fontaene nach ufe. Eimal meh faszinierend, was d'Natur alles buete tuet!
 
In Nelson acho, haet eus ganz es herzigs Staedli bi strahlendem Sunneschii erwartet. Nelson isch anschiinend DE Summerferieort fuer d'Neuseelaender. Wiiberge direkt vor de Huustuer und es hervorragends Klima macht de Ort mit de lockere Atmosphaere interessant. Mir haend eus dete Ziitvertriebe am wunderschoene und grosse Strand, sind zuefaellig i de Schicki-Micki-Gegend glanded (haend eus mal chli verfahre....) und haend eus natuerli de Ort aglueged und sind zum erschte Mal uf eusere Reis is Kino (fuer die wo's interessiert: family stone hemmer eus aglueged.
 

14./15. Februar 2006
 
Vo Nelson us simmer in wunderschoeni, 60km noedlich glegeni Abel Tasman Nationalpark gfahre. Dete chan mer wandere, kajakfahre und bi schoenem Wetter das einzigartige Naturerlebnis gnuesse. Leider haend mir noed viel gseh vo schoenem Wetter, bi eus haets gregnet. Mier haend eus drum fuer die eifacheri Variante entschlosse und d'Kueschte vom Nationalpark miteme Boot aglueged. Einsami Sandstrand, schoeni Buchte und en Robbefelse haend eus erwartet.
 
I de fruchtbare Ebeni vo Marlborough hemmer daenn in Blenheim uebernachtet. Ganz id Noechi werded mer in es paar Taeg wieder cho, vo Picton us fahrt naemlich d'Fahre uf d'Nordinsle. Picton isch ca. 20Min mitm Auto vo da us entfernt.

Vo Blenheim us simmer e Schoggifabrik go besichtige (ok, ok, eus ischs nume um d'Schoggi selber gange, noed um d'Herstellig) und es herzigs Schloessli inmitte vom Wiigebiet go aluege. Dete simmer uf de Turm ufegstiege und haend die herrlichi Ussicht ueber s'ganzi Gebiet bestuuned. Wieder dune, simmer chli aneghoeckled und haend eifach die schoeni Atmosphaere gnosse. Ploetzli merked mir, dass eusi Kreditkarte noed mitcho sondern bim uschecke ligge bliebe isch. Glueck im Unglueck: de herzigi Host vo eusem Motel haet dem Schloessli agluete - er haet vermuetet dass mir dete sind - und eus mitteile lah, dass mir d'Kreditkarte choend abhole. Mir haend sie am glichige Tag wieder uebercho und choend so wieder munter Geld usgaeh! :o)
 
 

16./17. Februar 2006 / letschti Ussichte uf d'Suedinsle, Ferry zu de Nordinsle
 
Vo Blenheim ade Ostkueste simmer wieder ad Westkuechte gfahre, haend nomal e Nacht dete verbracht und sind daenn via de bekannti Arthur's Pass (en Pass uf 735m) retour uf Christchurch. Ueber de Pass haet eus s'fruchtbare Land vo de Ebeni vo de Canterbury Plains begleitet, mier haend entlang em Waimakariri Fluss einsami Farmsiedlige gseh und sind ueber e ganz e neui Brugg - Otira Viaduct- gfahre. Huegeligi Graslandschafte, moosige Waelder und die immer wieder tolli Ussicht uf en unglaublich schoene Teil vo de Suedinsle haend eus begleitet. Es isch fuer eus ideal gsi, als Abschluss vo eusere Suedinsle-Rundfahrt de Pass z'fahre und nomal choenne die herrliche Gegende z'gseh.
 
Wieder retour in Christchurch, hemmer eus ganz i de Noechi vom Bahnhof ufme Campingplatz igmietet. De Thomas haet s'Auto retour bracht und d'Petra haet sich de Woesch agno.
Nachhere chalte Nacht (mier haend kei Deckene sondern nume euse Siideschlafsack und natuerli kei Heizig gha) ischs am Morge am viertel ab sechsi losgange Richtig Bahnhof. Nach ca. 15 Min. laufe simmer mit Sack und Pack dete acho und bald scho ischs mitm Zug uf Picton gange.
Wow, das isch daenn e herrlichi Fahrt gsi!
I ca. 6,5h simmer 347 km de Kueschte entlang tuckerled, sind durch 21 Tunnel und ueber 175 Bridges gfahre und haend zum letschte Mal die sanfte Huegel und die faszinierendi Landschaft vo dere Insle uf eus wirke lah. In Picton ischs daenn grad uf d'Faehre gange, es riesigs Ding isch das gsi! D'Ferry haet eus in knapp 3h durch die zerkluefteti Landschaft und die stimmigsvolle Buchte vo de Queen Charlotte Sounds (ganz im Norde bzw. Nordweste vo de Suedinsle) via offnigem Meer nach Wellington bracht.
 
So, das waeris gsi vo de Reisebricht vo de neuseelaendische Suedinsle. Jetzt gahts ab uf d'Nordinsle, wo mier miteme Campervan tuend d'Insle erkunde. Da findsch Du de erschti Reisebricht.