Neuseeland (Nordinsle)

17.-21. Februar 2006 / Wellington mit de Petra und em Dirk
 
In Wellington acho, haend mir euses Gepaeck gschnappt und eus uf d'Suechi vo eusere erschte Unterkunft welle mache. Es isch eso gsi, dass d'Petra dummerwiis s'Bestaetigungsmail haet vergesse usdrucke und mier so nume de Name vo de Unterkunft gha haend. Mier haend kei Ahnig gha wo die gsi isch und d'Taxifahrer haend eus au noed choenne witerhelfe. Eine haet sich sogar gweigered, eus mitznaeh.... Hemmer ziemlich unverschaemmt gfunde. D'Petra haet daenn ufme Parkplatz e Frau aquatscht. Die isch zwar sehr nett gsi, haet aber au noed wiitergwuesst. Mri sind drum in en Backpacker grad ide Noechi vom Bahnhof eus go erkunde. Uff, endlich gschafft. Mir haend gwuesst dass mir usserhalb vo Wellington wohned, dass mir muend de Zug naeh und nachher mitm Bus oder miteme Taxi wiiter fahre. E supernetti Dame, wo mier daenn a eusem End-Bahnhof nachm Weg erkunded haend, hat eus grad mitm Auto direkt zu eusere Unterkunft gfahre. Lange Rede, kurzer Sinn: mir sind ca. 2,5h nach de Akunft vo de Faehre i eusem Room gsi. Ziemli erschoepft hemmer eus bitsli spoeter daenn uf d'Suechi nach oeppis essbarem gmacht und sind daenn im Vorort vo Wellington umegspaziert. De superfeini Znacht ime Inn-Lokal haet eus fuer d'Umstaend chli entschaedigt und d'Vorfreud uf Wellington selber isch gstiege.
 
Nachdem mier daenn am naechschte Morge eusi neui Unterkunft bezoge haend- en sehr zentral glegene Backpacker inmitte vom Party- und Shoppingquartier- haemmer eus mit de Petra und em Dirk troffe. Mit ihne zaeme simmer fascht de ganzi Tag im Te Papa-Museum gsi. Dete hemmer viel ueber d'Maoris und ueber Erdbebe glese (Neuseeland befindet sich zwuesched de Indo-Asiatische und de Pazifische Erdplatte) und allgemein viel uebers Land und sini Entdecker  bzw. die erschte Iiwanderer erfahre.
 
Zeme mit "eusne beide Farmer" hemmer unter anderem e Fuehrig durchs Parlament gmacht, sind mitm Cable Car uf de Berg ufegfahre, haend fein chinesisch, mexikanisch und italienisch Znacht g'aesse, fein Zmoergeled und haend vorallem viel mitenand plaudered und glached. Und, noed z'vergesse, mir sind a eusem erschte Abig z'vierte nachm Znacht inen Club und die beide Petras haend sich bald emale uf d'Tanzflaechi gstuerzt ;-) 

22.-27. Februar 2006 / erschti Camper- und Vulkanerfahrige
 
Gege Abig vom 21.Feb. hemmer euse Camper abgholt. Ich erwaehne da jetzt noed gern, dass mir nomal haend muesse i de Vorort fahre wo mier eusi erschti Nacht in Welington verbracht haend....   
 
Nachdem eus en Agstellte vo de Camper-Firma alles gnau erklaert haet, ischs scho bald losgange. Haet alles gar noed so kompliziert toent, wenn mer devo abgseht, dass alles uf Englisch gsi isch und mier das zum erschte Mal ghoert haend :-)     Wills scho gege Abig gsi isch, hemmer bereits knapp 40km nach Wellington euse erschti Stopp igleit und ufme Parkplatz grad am Strand eusi erschti Campernacht verbracht. Isch halt scho laessig, wenn mer eifach neumets chan ahalte und finde, doch, da bliebed mier. Wild campiere isch i dem Land anschiinend absolut keis Problem, solang mer noed grad direkt voreme Eifamiliehuesli uebernachte tuet.
 
Am naeschte Morge hemmer festgstellt, dass mir beidi ziemli oft verwacht sind und dementsprechend nonig so wuerkli fit gsi sind. Aber das wird sich schono ipendle, das uebernachte im Auto. Isch halt scho noed s'glichige wie ime Zimmer miteme richtige Bett. Mir haend eus daenn uf de Weg gmacht und sind Richtig New Plymouth, District Taranaki, gfahre, ganz im Weste vo de Nordinsle. Zwuescheddure hemmer immer wieder chli ahghaltet und eus chli Ziit a de schoeni Straend und i de verschiedenige chline Ortschafte vertriebe.
 
Ufm Weg nach New Plymouth haet eus de Vulkan Taranaki ziemli beidruckt. Mir haend zu dem Ziitpunkt aber nonig gwuesst, das mir i.S. Vulkaen no meh Idrueck werded uebercho.....  De 2'518m hoechi Vulkan Taranaki (uf Maori) oder Mt. Egmont (wie  ihn die wiise Neuseelaender nenned) beherrscht die gsamti Region Taranaki. Wie en schlafende Ries trohnt er am uesserschte Westzipfel vo de Insle. Am einte Tag hemmer daenn e Wanderig im Egmont Nationalpark gmacht und debi verschiedeni Waelder durchquert und immer wieder en herrliche Usblick uf Taranaki abe gha.
 
Uebrigens, in New Plymouth simmer ufme Campingplatz gsi fuer 2 Naecht.
 
Wo mier a eusem letschte Morge dete haend welle abfahre, hemmer gmerkt, dass mit de Duschi bzw. mitm Wassertank irgendwas noed stimmt. Simmer grad gschnell id Garage gfahre. De Typ dete haet eus noed viel meh choenne sege weder das mir scho gwuesst haend. Immerhin haet er eus choenne bestaetige, dass mir ohni Problem so choend witerfahre.
 
A eusem naechschte Tagesziel, Turangi, acho, haet s'Visitorcenter genau vor eusere Nase zuegmacht. Simmer halt es paar Informatione bime Backpacker bzw. bim dazuegehoerige Kletterzentrum go hole und haend eus daenn grad dete ide Noechi ufeme Parkplatz igrichtet. De Thomas haet no agfroeged, ob mier det doerfed uebernachte. E aelteri Frau haet ganz herzig reagiert und gfunde "you are more than welcome to stay there. That is a very safe place". Was hemmer no meh welle?
Eusi zweiti wildi Campernacht isch daenn chli chueler gsi, so ohni Heizig. Mir sind daenn am Morge grad is Visitorcenter gange und haend dete es vorzognis Geburigschaenkli fuer eus beidi bueched: en Rundflug ueber die 3 Vulkaen!

Im Reisefuehrer staht folgendes:
"Majestaetisch ueberragen die Gipfel des Ruapehu (2'797m), Ngauruhoe (2'291m) und Tongariro (1'968m) den Nationalpark. Die immer noch aktiven Vulkane - schlafende Riesen - sind das Wahrzeichen und die Hauptattraktion des aeltesten neuseelaendischen Nationalparks.".
Das toent doch scho vielversprechend, oder noed?
 
Sofort nach de Buechig vo dem Flug simmer losgfahre in Tongariro Nationalpark und nach ca. 40 Min. ufm Flugplatz acho. Dete haet euses Flugi scho gwartet. Churz es paar Erklaerige vom Pilot, und scho simmer losgfloge mit de C172 Cessna. De Thomas als Co-Pilot vorne, Petra ide zweite und letschte Reihe vo dem Flueger hinde. 
 
De Rundflug isch fuer eus beidi es bsunders Erlebnis gsi! Mier haend die 3  Vulkaen vo obe gseh, Kraterraend, sind direkt obe drueber gfloge. Haend die atemberaubendi Ussicht uf die geographisch no "jungi" Gegend, 261'000 Jahr (s'Alter vo de Erde wird uf 5'000 Millione Jahr gschaetzt), gnosse und sind eifach hin und weg gsi vo dere ganze Gegend.

Da no es paar Infos zum Nationalpark:
- er ghoert zu de Ketti vo de vulkanisch aktive Gebiet im Pazivische Ozean
- 3 Vulkaen im NP sind aktiv:  Mount Ruapehu. letschti Us bruch 1995/1996, Mount Ngauruhoe, stoesst immer wieder Dampfmengene us / Mount Tongariro, immer wieder chlini Uusbruech, die letschte 1926.
- ghoert zu de World Heritage National Park. Unter anderem befindet sich dete au Stonenge (GB), Akropolis in Athen (GR), Milford Sound (Suedinsle NZ), Zosemiti National Park (USA), Grand Canyon (USA), Pompej (I), Pyramiede in Aegypte, Coloss vo Rom (I) dezue.
 
Nach dem unvergessliche Rundflug hemmer no e Wanderig gmacht i dem Nationalpark, sind aber noed bis zum Lava bzw. de Kraterraend ufegloffe, weri de Petra z'wiit gsi.
 
Danach ischs wieder mitm Camper wiiter gange, zu eusem naechschte Ziel. Will mer praktisch de ganzi Tag im Nationalpark verbracht haend, simmer nume no bis Ohakune cho. Das isch en chline, herzige Ort im Skihuette-Stil und de populaerschti Wintersportort vom Tongariro Nationalpark. Im Winter isch da einiges los, doch jetzt im Summer ischs schoen ruhig und mer chan gmuetlich durch de Ort schlaendere, ohni dass viel Tourischte ume sind.
 
Am naechschte Morge ischs wiiter gange. Taupo befindet sich am groeschte See vo Neuseeland, Lake Taupo. De isch mit 619 km2 bitsli groesser als de Staat Singapur und befindet sich ime riesige vulkanische "Iibruchsbecki". 40km lang, fast 20km breit. De Taupo-Vulkan isch vor 300'000 Jahr zum erschte Mal  usbroche, und 186 v.Chr. nomal. Danach isch de Krater in sich zaemegstuerzt und es isch en riesige See entstande.
Verschiedeni Thermalgebiet befindet sich i dere Region, tosendi Wasserfaell und warmi Quelle. Mier haend eus Craters of the moon aglueged. So muen d'Welt vor Jahrmillione usgseh ha, wos no fascht kei Lebewese gaeh haet. Kraterlandschaft, einsami Gegend, es Zische und Brodle us jedere Erdritze. Schono speziell wenn mer das zum erschte Mal gseht.
s'Volcanic Activity Centre haet eus mit sinere informative Usstellig ueber d'Vulkanlandschaft i de Gegend beidruckt. Mier haend sogar d'Glegeheit gha, de Usbruch vom Ruapehu im 1996 uf Video zgseh. Wahnsinn, choend mir da nume sege.
D'Huka Falls, de Masse a wohl eher Stromschnelle, hemmer natuerli au noed doerfe verpasse. Dummerwiis isch grad en Backpacker-Bus churz vor eus dete acho und es haet ziemli viel Luet gha. Aber mier haend doch no choenne es paar Fotene mache und de starchi Strom gseh. Es fluessed anschiinend pro Sekunde rund 235'000 Liter durch die 15m breiti Oeffnig.
 
Sodeli, jetzt simmer huet no de ganzi Tag in Taupo, leider isch s'Wetter noed so guet und mier loend deshalb die planti Wanderig. Tuend eus drum chli im Zentrum mit de verschiedene Laedeli umeluege und Ziit so chli vertriebe. Und  ihr diheime ide Schwiiz haend au no chli oeppis vom weniger schoene Wetter bi eus: d'Homepage wird aktualisiert! :o)


1.-13. Maerz 2006 bzw. Zaemefassig Nordinsle: Vulkanismus pur, Cape Reinga und Auckland
 
Mir wuessets, ihr alli wartet jetzt da uf en lange, usfuehrliche und interessante Reisebricht (oder zumindest die wartet, wo sich immer wieder so nett bi eus ueber die tolle Reisebricht bedanked und eus so zeiged, dass sich de grossi Ufwand wuerkli lohnt).
Muend eu chli enttuesche, eus rennt d'Ziit devo. Ziit da im Internet, d'Ziit da in Auckland. Zudem hemmer euses Tagebuech und de Neuseeland-Reisefuehrer bereits hei id Schwiiz gschickt. Mier choend drum nueme uswendig jede einzelni Tag uffuehre... Uf jedefall da eifach mal e chlini Zaemefassig vo eusne Nordinsle-Erlebnis:
 
D'Ziit da uf de Nordinsle isch unglaublich schnell verbi gange. Mier haend nebed schoene Straend natuerli au DE Hoechepunkt vo de Insle erlebt: Vulkanismus und Maori-Kultur. Da defuer isch vor allem im Zentrum vo de Insle de Ort Rotorua bekannt. Dete haend mir verschiedeni vulkanischi Gebiet aglueged, total spannend und echt interessant. Es brodled und zischt und raucht dete ueberall chli us verschiedene Erdritze use. Wahnsinn! Durch d'Faszination vo dene Erd-Aktivitaete loesst sich de spezielli Schwefel-Gschmack i de Luft quasi "in Luft uf".....   Wobii, da schmoeckts jetzt grad chli komisch nach verfuulte Eier.... Ach nei, mier sind ja jetzt im Internetkafi vo eusem Backpacker in Auckland.... ;-)
 
Mier hand i de Umgebig vo Rotorua und au am Eastcape endlich mal chli oeppis ueber d'Uriwohner vo Neuseeland, d'Maoris, erfahre. Mer sind also erstuunt gsi, wie stolz d'Neuseelaender uf d'Maoris sind. Anderscht als d'Indianer i de USA, sind die Mensche kei Randgruppe und es wird wuerkli viel gmacht fuer d'Gliichberechtigung vo de Wiise und de Maoris.
 
Nebed viele wunderschoene Iidrueck, nette Bekanntschafte (siehe Nadja und Thomas bi de Foeteli) wird eus ganz sicher es speziells Erlebnis in Erinnerig bliebe: de Scenic-Flight ueber de Tongaria-Nationalpark ime 4-Platz-Flugi. Es isch also unglaublich idruecklich, die 3  Vulkaen vo obe choenne z'gseh. Um so schoener ischs no gsi, dass das es vorzognigs Geburi-Gschaenkli a eus beidi gsi isch :o)
 
Uf de Suedinsle simmer ja ganz am suedlichschte Punkt gsi. Entsprechend gits da uf de Nordinsle es Gegestueck, Cape Reinga. Leider haets ufm Weg det ane i de Region um de Ninety Mile Beach unglaublich fescht gregnet und gwindet. Mier sind also mit eusem Campervan nume langsam vora cho, d.h. anstatt um die 100km knapp 50km. Drum hemmer eus ungefaehr 20km vor em Ziel entschiede, dete ufm letschte und ziemlich einsame Campingplatz z'uebernachte und daenn am naechschte Tag wiiter zgah. Im groeschte Raege hemmers daenn i eusere chline "Stube" gmuetlich gmacht und ghofft, dass es bis am Morge bessers Wetter isch. Und siehe da: womer ufgstande sind um die achti ume haets nueme gregnet und die erschte Sunnestrahle haend zwuesched de  Wulche fuere guexled! Juhui! So simmer no de Reschte bis zu dem wiitischte Nord-Punkt uf ungeteerter Strass gfahre (natuerli gaaaanz langsam, mir waend ja kei Zoff mit de Autovermietig) und sind total froh gsi, hemmer eus noed scho am Abig vorher da ane begaeh. E wiiti Sicht, en Luechtturm und d'Wegwiiser i verschiedeni internationali Staedt haend eus erwartet. Es isch zwar zehr windig gsi, aber mier haend beidi gfunde: tolle Abschluss vo eusere Neuseeland-Reis!
 
Und scho sind eusi letschte Taeg da gsi und mir haend de Camper abgaeh (alles tiptop gloffe, usserd dass mier haend muesse, entgaege de Bestaetigung bi de Entgaegenahm vom Camper, Diesel-Gebuehre pro gmachti Kilometer zahle. Bi knapp 3'900km haet das doch no bitsli oeppis usgmacht) und haend in Auckland im Backpacker icheckt. D'Taeg i de groeschte Stadt vo Neuseeland haend mir natuerli mit de Besichtigung vom Skytower verbracht. Zudem sind mier sehr viel umegspaziert, haend die verschiedene Stadtbezirk aglueged, sind i 2 Paerk gsi, chli is Kino, bitsli goge Souvenirs shoppe und haend de Petra ihre Geburi gfiired. En Tagesuflug uf die vulkanischi Insle Rangitoto (de juengschti Vulkan vo ca. 50 Vulkaen um Auckland ume) hemmer au no gmacht, natuerli chli d'Homepage mit Bilder und chli Text "gfuettered", eusi Woesch gmacht und eus so chli vo dem wunderschoene und unglaublich idrueckliche Land verabschieded.
 
Jetzt simmer ready uf es neus Erlebnis. Morn morge flueged mir am 9h via Sydney und Adelaide uf Hobart, Tasmanie.

Mier verloend Neuseeland mit wunderbare Erinnerig a tolli Sandstraend, a einsami Regione, dichti (Raege-)Waeld, tuefi Fjordlandschafte, a e wunderbari Tierwelt und hilfsbereite Kiwis.
 
Sodeli, das isch es gsi us Neuseeland, em wohl "schoenschte Endi vo de Welt"! Mir melded eus wieder us Australie. Cheers & see ya!