AU - Tasmania

14.-24. Maerz 2006 / Tasmanien (Tassie)  

Nach doch knapp 2 Moenet Neuseeland haend mir eus i de erschte Taeg uf Tasmanie, mier haend uf Hobart verbracht, wieder chli a es neus Gebiet muesse gwoehne und eus "aklimatisiere". Mier haend gfunde, das laht sich doch grad am beschte mitm erkunde vo Hobart mache.
Mir haend eus daenn sehr spontan beschlosse, e 3stuendigi Pub-Tour z'mache und dadebi d'Hauptstadt bzw. gwuessi Regione und vorallem d'Pubs kenneglernt. Da debi haend mir au d'Nicole und de David us Calgary bzw. Melbourne troffe und sind mit ihne im letschte Pub verhocked und nachher no mit ihne spontan goge Znacht esse. Irgendwenn vor Mitternacht haemmer daenn welle euses Auto zur Tüfgarage usehole. Doch siehe da: geschlossen! Irrtümlicherwiis hemmer gmeint, s'Auto staht inere 24h-Garage. Naja, isch chli viel Spontanitaet gsi huet ;-)   Nachere churze Warteziit ime komische und dunkle Hinterhof haet eus daenn euse Retter erloest und mier haend s'Auto wieder choenne abhole. Das isch ja es Erlebnis gsi grad am Afang vo eusem Tasmanie-Ufenthalt! Mier haend glached und im Stil vo de Australier gfunde "no worries"! ;-)  
 
Ja, was so bitsli chaotisch aber spannend agfange haet, isch toll witergange. Mier haend eus bald uf de Weg gmacht um Port Arthur, d'Ruine vonere ehemalige Straeflingssiedlig, z'besichtige. Isch unglaublich spannend gsi. Eimal meh en Ort uf eusere Reis, wo mier gern d'Ziit zrugg dreht hetted und als chlini Müsli chli erlebt hetted, was so abgaht. De Thomas haet daenn da übrigens no e "Ghost-Tour" gmacht am Abig, für die aengschtliche Petra isch das nix gsi ;-)
Port Arthur ghoert zu de meistbsuechte historische Staette in Australie - meint euse Reisefuehrer.   
 
Chli noerdlich vo Hobart haend mir daenn no s'historische  Staedtli Brighton bsuecht. I dem Ort gits ziemli vieli "Sache" wo zu de aeltischte vo Australie ghoered: e Chile, es wunderschoens Poscht-Gebaude, es Gmeindshuus, e Steibrugg. Nach so viel Kultur hemmer gfunde, müemer wiedermal inen Nationalpark chli goge wandere und DE Wasserfall (Russel Falls) vo Tasmanie goge aluege. Dummerwiis haend mier eus verfahre und irgendwo en Wegwiiser verpasst. Naja, au da wieder "no worries". Mier sind daenn halt wiiter mitm Auto Richtig Weste gfahre, alles durch de Raegewald. Glandet simmer im fuer eus ziemlich suspekt wirkende Goldgraeber-Ort Queenstown. Eusrer Meinig na alles düster, verlasse, alt, ungepflegt. Mir haend dete nume gschnell oeppis ime Pub gaesse (sehr fein gsi, immerhin) und sind bald go schlafe. Aber nume, dass mer am naechschte Morge haend choenne früeh ufstah und de spezielli Ort hinter eus lah.
 
Im Weste vo de Nordküste haet eus daenn e tolli und wunderbari Region erwartet. Mier haend eus im chline Ort Stanley superwohl gfühlt und sind natürli grad uf de "Huusberg" ufe. The Nuts. Das isch quasi de Uluru/Ayers Rock vo Tasmanie.   Zmitzt uf de Insle, in Launceston, haend mir eus en Tag spoeter daenn für 3 Naecht ime ziemlich moderne Backpacker igmietet und vo da us verschiedeni Usflüg gmacht. Unter anderem simmer au in Interlaken gsi. E "Ortschaft" wo no us es paar verlotterete Hüser i de tasmanische Einsamkeit lieht. Womer doch scho bi de Schwiizer Ort sind: s'tasmanische Grindelwald hemmer au no gseh. Das isch no speziell gsi: in Grindelwald BBQ esse, Latinomusig lose, rundume Englisch ghoere und unterenand Züridütsch rede. Multikulti nennt mer doch das, oder? ;-)  
 
Am Geburi vom Thomas am 22.Maerz simmer in wunderschoeni Freycenet National Park und haend dete d'Sunne und blaue Himmel gnosse (isch extra wegem Geburtstag bstellt gsi) und die bekannti Wineglassbay bestuunt. 
 
En Bsuech im superschoene Wildlife Park "Bonorong" uf eusere Rundreis noed doerfe fehle. Das isch en Park, wo vieli Tier frei umelaufed und mer so als Bsuecher d'Glegeheitheit, die verschiedene Tier kennezlerne. Isch noed so "Zoo-maessig" das Ganze. I dem Wildlife Park hemmer die herzige Wombats gseh, Koalas, vieli Wallabys und Kaengis und natuerli au DAS iheimische Tier vo Tasmanie, s'bekannte Tasmanische Tuefeli. 
 
Nach knapp 2 Wuche Tasmanie-Rundreis simmer wieder i de Hauptstadt retour gsi und haend choenne sege, doch, mier haend Tasmanie gseh. Mir haend vieli schoeni Wanderige gmacht und trotz em immer wieder eher chüele und nasse Wetter d'Natur choenne gnüsse. Vo Hobart us hemmer natürli no d'Russelfalls aglueged (die wommer am Afang verpasst haend), sind uf de Mount Wellington ufe und haend in Claremont/Hobart no es Schwiizer Museum, Alpenrail, aglueged.