AU - South Australia / Adelaide

25.-31. Maerz 06 / erschti Ziit in Adelaide und Bsuech uf Kangaroo Island (KI) 
 
Nach ere churze und agnehme Reis vom Backpacker in Hobart in en neue Backpacker in Adelaide simmer no chli eusi neu Umgebig goge aluege und eus no chli go informiere, wie/wo/was. Am naechschte Tag ischs daenn losgange: die grossi Information. Isch halt immer so, wenn mer ame neue Ort bzw. inere neue Region achunnt. Es brucht en ziemliche Ziitufwand, vieli Gsproech und vorallem d'Verglich vo de verschiedenige Agebot. Urspruenglich haend mir planed, i de Ziit vo de Akunft in Adelaide bis mier daenn euse Camper in Empfang naehmed, s'Outback (inkl. Uluru bzw. Ayers Rock) goge aluege.Verschiedeni Gruend, u.a. Reisechoschte det ane wo eifach wuerkli noed i euses Budget inepassed, haend eus dezue bewegt, erscht nach Empfang vom Camper is sogenannti roti Zentrum z'fahre. So haend mir daenn en Tripp fuer uf Kangaroo Island bueched und gfunde, lueged mir d'Umgebig vo Adelaide no chli noecher a. 
 
Ufgfalle isch eus da bsunders oeppis: die warme Temperature und de strahlend blaui Himmel! ;-)  Sind mir doch uf Tasmanie oft mit Faserpelz umegloffe und haend i de Naecht viel chalt gha, haend mir da eusi Flipflops und aermelose T-Shirts wieder choenne uspacke. Herrlich! Jaja, mier wuessed, bi eu diheime ischs im Moment wettermaessig noed so traumhaft.. aber mier glaubed dra, de Fruehlig chunnt bestimmt bald. De Australier wuerdi da jetzt ganz locker saege "no worries"!  
 
Wo mir zmitzt i de Nacht, bzw. am Morge um 5.15h, ufgstande sind und eus parat gmacht haend fuer uf euse Kangaroo Island-Trip, haets dusse doch taetsaechlich gwittered und fescht graegnet!! Mier oder besser d'Petra haets fascht noed choenne glaube, de Thomas haet gfunde "no worries". Zum Glueck ischs daenn halb so schlimm gsi und uf de knapp 2stuendige Fahrt zum Cape Jervis, em Sprungbrett nach Kangaroo Island (KI), haets nueme fescht graegnet, sondern  nume no fescht gwindet. D'Fahrt mit de Ferry isch trotzdem guet gange und haet zum Glueck nume 45 Min. duured.   
 
Uebrigens: Kangaroo Island befindet sich ca. 110km suedwestlich vo Adelaide und isch mit 4'350km2 die drittgroeschti australischi Insle nach Tasmanie und Melvill Island bi Darwin.

Uf de Insle acho, isch de Himmel no bewoelkt gsi, aber es haet scho chli fruendlicher usgseh. En tolle Guide und e laessigi, chlini Gruppe (12 Persone, devo 9 Schwiizer) haet eus erwartet und los ischs gange ime chline Bus ueber d'Insle. De Dave haet eus d'Insle in wiitgehend unberuehrter Natur zeiged und mier haend 2 wunderschoeni, interessanti und vor allem au luschtig Taeg verbracht. Mier haend die bunte Voegel Lorikeets gseh, die beidruckende Black Cackatoos (leider hemmer die noed choenne foetele), vieli Kangaroos, Wallabys, Seeleue, Robbe und sogar au Koalas in wilder Natur. Die Tierli haend i de Astgabelige hoch obe i de Baumchrone pfused oder gnuesslich ihri Eukalyptusblaetter gmampft. Mer haend choenne Little Sahara - grossi Sandduene- bestiege, vome Holzsteg us Robbe und Seeleue beobachte, ame andere Ort am Strand bis uf ca. 15m a Robbe aneglange, Kangis fuettere und Koalas streichle und die wunderschoeni Natur und Umgebig vo dere Insle gnuesse.
Am Abig hemmer eus im Flinders Chase National Park ufere Farm igrichtet, s'Lagerfuer azuendet (und Faserpelz und Jagge montiert, wills doch ziemli chalt gsi isch) und i de Daemmerig zmitzt im Busch usse boxendi Kaengurus beobachtet.  
 
Churz vor Mitternacht am zweite Tag sind mier daenn wieder retour gsi in Adelaide und nacheme Schlummi i de Bar bi eus im Huus simmer gluecklich und zfriede ipfused. De Usflug uf Kangaroo Island haet sich - trotz em noed soooo supertolle Wetter - wuerklich glohnt!


1. – 4. April 2006 / rots Zentrum vo Australie, mier choemmed!
 
Lang, lang ischs her, sit mier eu en Reisebricht us eusem glebte Traum gschriebe haend (d'Ziit vergaht so schnell!) Mier probiered jetzt, so guets gaht, das nah zhole:
 
Nachdem mier euse neu Camper in Adelaide in Empfang gno haend, ischs nachm Grossichauf direkt Richtig Norde gange. De Petra ischs zerscht bitsli unwohl gsi, mit some grosse „Ding" durch d'Gegend zfahre, aber das komische Gfuehl („eigentli wuer eus ja en oeffentliche Bus und es Zelt lange") haet sich sehr gschnell gleit. Naemlich nume scho knapp 80 km nach Adelaide isch die Wiiti, wo mier scho in West-Australie kenneglernt haend, wieder da gsi. Natuerli sind immer wieder Hueser uftaucht, aber es isch praktisch gaege „s'Nuet" usegange. Und da isch es wieder gsi:s'Gfuehl vo de Freitheit. S'Gfuehl vom liecht si, vode Unbeschwertheit. Gliichziitig au Glueck, Freud und Dankbarkeit, dass mir euse Reisetraum laebe choend. Eifach immer wieder unbeschrieblich schoen!
 
So sind mir also mit eusere „Wohnig" und em Auto fuer die naechschte 2 Moenet via Port Augusta ufm Stuart Highway – die einzigi geteerti Nord/Sued-Verbindig (ca. 3'000km) im riesige Gebiet vom Outback - nach Norde duest!
 
Da, noerdlich vom 32. Breitegrad lebed nume knapp 1% vo de Bevoelkerig vom Staat South Australia. Eifach so chli als Info, damit mer sich au vo de Schwiiz us die „Leeri" chan vorstelle.
 
Wie gseit, mir sind via de Industriestadt Port Augusta (vo da us sinds no 1'200km nach Alice Springs) Richtig „rots Zentrum" gfahre, verbi anere Chetti vo Salzsee und spezielle Buesch, durch d'Sperrzone vo Woomera (isch 1947 als Startplatz fuer britischi Rakete benuetzt worde und als Ort fuer Tests und Entwicklig vo Rakete. U.a. au militaerischem Stuetzpunkt vo de USA und England) und durch s'schier endlose Gebiet Richtig Northern Territory. Nach 550km simmer daenn in Cooper Pedy acho, womer nomal e Uebernachtig igleit haend. Cooper Pedy isch oeppi ide Haelfi Adelaide-Alice Springs, und scho zmitzt i de Wueschti ine.
De Ort giltet als „Mondlandschaft", ueberall haets Krater. Alles isch staubig und troche. Praktisch kei Hueser. Nueme grossi Huegel mit Sand und Staub ueberdeckt. Vieli Fluege wo nerved und wenig Luet (die wenige womer gseh haend sind bereits Aborigines gsi) uf de Strass. So speziell de Ort au wirkt, so speziell isch er au: vo Australie her choemmed naemlich rund 96% vom gsamte Opal-Bedarf vo de Welt, devo rund 85% us Cooper Pedy! Mir sind eus bald bewusst gsi, dass mir im mengemaessig groeschte Opalproduzente-Ort hoeckled. Nach gnauerem Hiluege hemmer gseh, dass es under dene Huegel Hueser hat, Hueser und Opal-Shops... Mier haend eus noed entgah lah, so e Undergrund-Wohnig vo inne azluege, en Drink inere Undergrund-Bar z'schluerfe, eus z'erchlaere lah wie Opal gunne wird (vo da her choemmed au die viele Huegel i de ganze Umgebig - Opalmining) und natuerli au, Opal z'poschte. D'Petra isch jetzt stolzi Bsitzerin vo neue Ohreringli! Im einte Shop ine sind no verschiedeni Tier vom Outback vorgstellt worde. D'Petra isch so sehr mit em Opal-Schmuck beschaeftiged gsi, dass sie die langi, bruuni, lebendigi Schlange im hinterschte Egge vom Verkaufsruum gar noed gseh haet....
 
Nach some erlebnisriiche Tag hemmer daenn nume no eis choenne: vor eusem Camper d'Stuehl ufstelle und de herrlichi Sternehimmel in the middle of nowwhere bestuune!
 
Da gaht eusi Reis wiiters, nach Alice Springs, is Zentrum vo Australie!


13.-17. April 2006 / Ostere in Mt. Gambier

Nach em Outback isch also wiiters gange wieder Richtig Suede bzw. Sued-Weste. Euses naechschti Ziel isch d'Great Ocean Road gsi. Churz vorher hemmer eus ueber Ostere ufme Campground igmietet und so es paar Taeg im chalte und ziemlich nasse Mt Gambier verbracht. Die gsamti Region rundume isch vor es paar Millione Jahr vom Meer bedeckt gsi. Ueberall gits drum verschiedeni  Hoehlene und „sinkholes" (igstuertzi Hohlruem, wo sich mit Grundwasser gfuellt haend). Erloschnigi Vulkaen und Kratersee u.a. im Ort selber sind Zuege vo fruenere vulkanische Aktivitaete. D'Besichtigung vo dene Vulkaen und de wunderschoene Kratersee und de verschiedenige „sinkholes" haend drum zu eusere Oster-Beschaeftigung ghoert. So guets halt im Raege gange isch :-)
 
S'einzige wo eusi Oster-Taeg bzw. d'Taeg davor truebt haet, isch d' Nachricht gsi, dass oepper vo eusere Familie haet muesse notfallmaessig in Spital. Mir sind da vo einere Sekunde i die ander us eusem Reisetraum brutal id Realitaet gholt worde. Bis d'Bestaetigung cho isch, dass kei Lebensgfahr bestaht, sind mir ziemli verzwiflet gsi. Mer sind eus hilflos vorcho und mer haend realisiert, dass mir vom andere Endi vo de Welt absolut nuet choend mache. In Gedanke haend mer eusi Sache bereits packt gha und sind im Flueger nach Zueri gfloge. Es isch eus wiedermal bewusst worde, wie wichtig doch d'Gsundheit isch und wie dankbar dass mer si muen, wenns eim selber und de wichtigschte Luet im Lebe guet gaht!
 
Reisebricht Great Ocean Road  nach Melbourne