AU - Northern Territory / Alice Springs, Darwin

5. – 12. April 2006 / wunderschoeni Outback-Erlebnis mit Aborigines-Flair
 
Fuer eusi letschti und laengschti Strecki nach Alice Springs hemmer, inklusive es paarmal Ahalte, knapp 7h brucht. De Weg da ane isch sehr interessant gsi, vo de Vegetation her (ja, da im Outback gits wuerkli au Baeum, Struecher und Graeser), vo de verschiedenige Farbe vom Sand her und natuerli au wege de verschiedenige Tier. Mier haend 2 Dingos gseh (die haend eus gnau so unglaeubig agafft wie mier sii), en Emu und mehreri Wedgetailed Eagles (Adler), wo am fresse gsi sind. Leider hemmer au immer wieder toti Kangaruhs am Strasserand atroffe, aber das hemmer vor allem vo Tasmanie her kennt.
 
Huet a eusem 5-monatige Reisejubilaeum simmer jetzt also in Alice Springs acho. Knapp 1'500km sinds bis nach Adelaide,  und wiiteri knapp 1'500km bis in Norde nach Darwin. De erschti Idruck vo de Petra isch gsi „ui, da gits ja richtigi Hueser". Alice, wie de Ort vo de Australier gnennt wird, isch en herzige chline Tourischteort mit Fussgaengerzone, chline Bars, Restaurants, Reisebueros, vielne Galerie und Kunstlaedeli wo mer chan Aborigines-Kustwerk chaufe. Es git Shopping Center, Motels, Campgrounds und e Busstation. S'einzig truurige a dem Ort sind die viele Aborigines, wo im meistens ustroechnete Flussbett vom Todd River campiered. Sie stoehnd und liegged au suscht ueberall chli ume. Isch fuer eus recht en speziellie Idruck gsi. D'Luet, wo ja wuerkli d'Uriwohner vo dem Land sind, haend meistens dreckigi Chleider agha, kei Schueh, sind allgemein sehr dreckig und oft au betrunke gsi. Isch scho schlimm, wenn mer das so live gseht.
 
Mir haend eus Alice Springs chli gnaeuer aglueged, haend d'Royal Flying Doctor Service aglueged, School of the Air und natuerli au s'Wasserloch Alice Springs, ganz ide Noechi vo de Telegrafestation. Die Quelle isch de Ursprung vom Ort gsi, spannend wie das alles entstande isch. Zum eu diheime das z'erchlaere, bruchts z'viel Ziit. Ihr muend das selber mal go bsueche :-)  
Mir haend au en 4WD-Usflug de West-Mac Donnel Ranges mitm Palm Valley und de ehemals duetsche Mission Hermannsburg gmacht. Wahnsinnig idruecklilch, total spannend und eifach faszinierend, die gsamti Umgebig. Aber d'Gschicht wie d'Aborigines vertriebe worde sind, wie ihne alles weggno worde isch, das isch eifach schockierend!
 

Nach eusem Bsuech im Hauptort vom Outback ischs daenn wiiters gange. Will mir mit eusem Campervan kei ungeteerti Strasse doerfed fahre, haemmer chli muesse en Umweg mache und sind so nach 5h fahre (und no 2 extrem tuere Tank-Stops) im Resort vom Kings Canyon acho. Die einzigi Moeglichkeit, zum i de Noechi vo dere Schlucht z'uebernachte. Da gits also sehr tueri Zimmer, Backpacker-Unterkuenft, Familiezimmer und natuerli en Campingplatz fuer die mitm chline Budget bzw. fuer die mitm Zelt oder em Camper J   Mier haend daenn am Abig zmitzt im rote Wuestesand ine de Sunneuntergang ueberem Kings Canyon aglueged. Eifach wunderschoen, das Farbespiel vo de Natur! Wo d'Sunne weg gsi isch, isch daenn aber rassig ganz dunkel gsi. Mier sind ja no voll im „Nuet" ine, rundume nume puri Natur.

De naechschti Tag hat scho superschoen agfange: mir haend de Sunneufgang churz vorm siebni gseh und daenn dusse gmuetlich Zmorge gesse. Churz druf abe ischs no die letschte 7km zum Kings Canyon mitm Auto gange. D'Petra isch chli hibbelig gsi, sie isch noed sicher gsi, ob so e Wanderig ufm Canyon obe oeppis fuer sie isch. Wenn mer aber so vor dem ganze Berg staht, MUESS mer die Rundwanderig eifach mache! De Weg vom „KingsCanyon Walk" haet eus zerscht ad Felskupple ufegfuehrt, das isch en ziemlich steile Ufstieg gsi. Vo dobe haet mer aber scho e tolli Ussicht gha. Wiiters ischs daenn ca. 6km ueber Stock und Stei und ueber verschiedeni Staegetritt gange, zum „Garden of Eden" wo wuerkli en traumhafte und unglaublich ruhige und besinnliche Ort isch. Im Wasserloch ine haet sich de rot/orangischi Felse gspieglet, mir sind lang alleige dete gsi, ohni Tourischte, ohni Laerm. Mir haend eifach d'Atmosphaere choenne ufsuuge und de Vogelstimme rundume zuelose. Eifach unvergesslich! Schliesslich ischs daenn zum Suedrand vo de grosse Schlucht gange und vo det obe abe haet mer daenn de Canyon gseh! Es isch es paar Meter tuef abe gange, d'Farbe haend im blaue Himmel vollkomme glueckted. D'Bedaenke wege de Hoechi sind bide Petra schnell weg gsi, trotzdem haet sie immer schoen en Sicherheitsabstand vo es paar Meter bhalte :-)    Nach wiitere 3km simmer daenn wieder retour bim Parkplatz gsi und was haet eus dete erwartet: en chliine Wohnwage vom Resort wo en junge Maa chalti Drinks (sogar Redbull!!) verkauft haet!
 
Nach dem wuerklich traumhafte Hike undere wohl verdiente Pause simmer daenn gluecklich is Auto ghoeckled und oeppe 3h zum Ayers Rock Resort gfahre. Churz zuvor haemmer de Ayers Rock (ide Sprach vo de Uriwohner Uluru gnennt) gseh, eus isch beidne eifach chalt de Rugge abgloffe bim Ablick vom Australie-Wahrzeiche. Da staht de riesigi Monolith, zmitzt ine. Und strahlt sini Chraft und Rueh us.
Mir haend icheckt im Resort und eus churz ufm Campground ufghalte. Aber au da wieder:vom absolute Luxus-Room sprich Praesidente-Suise, romantische Candlelight-Dinner underem Sternehimmel und em Zeltplatz mit BBQ-Grill haet mer da alles choenne ha. Meh sogar, Shoppingcenter, Souvenir-Shops und sogar e Post haets gha! Irre, und das zmitz ide Wueschti ine!
Waehrend eme Ufenthalt im Cultural Centre hemmer viel ueber d'Aborigines, ihri Art z'lebe, ueber ihri Kultur und ueber die sogenannti „Dreamtime" (en bessere Usdruck isch im Englische nonig gfunde worde) erfahre. Mir sind daenn no mitm Auto um de Berg umegfahre und oeppe e Stund vorm Sunneuntergang haemmer eus daenn uf de „Sunset-Parking" igrichtet. Zeme mit es paar anderne Tourischte, Nuessli, Drinks und eme Faecher zum d'Fluege wegwedle haemmer daenn de wunderschoeni und atemberaubendi Uluru bi Sunneuntergang bewundered.

Und scho isch euse letschti Outback-Tag abroche. Mir haend mind. 17km Walks gmacht, indem mir naemlich zerscht bi de Olgas (Kata Tjuta) s'Valley of the winds bewandered haend und nachher no die 9km um de Uluru under eusi Trekkingschueh gno haend. De ganzi Tag isch wunderschoen gsi. Obwohls astrengend gsi isch und die viele Fluege gnervt haend. Mier haend aber im Valley of the winds vieli Voegel gseh und sogar usme Baum use Wellesittich ghoert, die aber leider noed gseh. Mir haend eimal meh wunderschoeni Natur doerfe erlebe, sind praktisch alleige unterwegs gsi und eifach d'Natur choenne gnuesse!
 
Da no es paar Infos zum Uluru: er bestaht us 650 Millione Jahre altem Sandstei und haet en Basisumfang vo 9km. Er isch 3,5km lang, 2,4 km breit und 384km hoch. Leider gits immer wieder Tourischte, wo trotz Warnschilder uf de heiligi Berg vo de Aborigines ufechlettered. Das isch absolut noed noetig, mer chan de Berg au vom Bode us sehr sehr guet gspuere! Es wird vermuetet, dass de Felse underem Bode no einige 100m wiiter abe gaht. Uluru isch das Wahrzeiche vo Australie und ghoert de Uriwohner, wie au de gsamti 1'325km2 grossi Nationalpark rundume.
 
Eusi letschti Nacht im Outback haend mir ade Chruezig zu Alice Springs verbracht. Mier haend dete ide Nacht direkt vor eusem Campervan Bsuech vo 4 Kangurus gha (haend mir usm Feister use choenne beobachte), sind am Morge vom luute Vogelgezwitscher vo de vielne Papageie i de Baeum rundume ufgwacht und haend eifach nomal de Duft und d'Aura vo dere spezielle Umgebig i eus ufgsoge.
 
S'gsamti „Outback-Abentuer" haet sich fuer eus absolut glohnt! Obwohl mir das mitm Camper gmacht haend, das isch ja am Afang gar noed eso planed gsi. Mier choend das einmalige Erlebnis definitiv zu eim vo eusne Reisehoehepuenkt zaehle! Die viele Tier wo mer gseh haend (Kangurus, Wallabis, Papageie resp. Kakadus, Adler, wildi Perd, Rinder, Emus, Dingos, Thorny Devils und chlini Echse) verstaerched de Idruck nume no meh!