AU - Victoria / Melbourne

18. – 23. April 2006 / Great Ocean Road und Melbourne

Nachdems ja praktisch ueber die ganze Oster-Taeg noed guets Wetter gsi isch, hemmer gfunde, goemmer sofort wiiters. Leider isch de Wetterbricht au churz vor de Great Ocean Road gar noed guet gsi, aber was wot mer da mache. Mer haend drum eusi Plaen g'aendered und eus bim kanadische Paar Nicole & David uf en Bsuech ide naechschte Taeg gmeldet (die beide wohned churz vor Melbourne ide Stadt Geelong). Trotz dem schlechte Wetterbricht haet d'Petra aber glich mal de Wecker uf die halbi siebni gstellt. Und was erwartet eus bim Blick usm Feister? Blaue Himmel und SUNNE!!! Nomal Planaenderig. Ganz klar: noed via Highway uf Geelong, sondern sofort via Great Ocean Road witers nach Geelong. Und das hemmer daenn au gmacht und die wohl schoenschti Kueschtestrass vode Welt befahre. Wahnsinn, was eus dete adere Limestone-Coast erwartet haet! Verschiedeni Felsformatione – alli us Limestone gformt -, drunder natuerli s'ueberwaeltigendi und bestens bekannti Panorama vo „the twelve Apostles".
Mir haend unglaublich Glueck gha:churz vor Endi vode Great Ocean Road sind Wulche uftaucht und scho bald drufabe haets graegnet! Mer haends grad no uf de naechschti Campground gschafft und eus dete igrichtet. Am naeschte Morge das selbe Spieli: wunderschoens Wetter churz nachm ufwache, es paar Stund spoeter dunkli Wulche. Die cheibe Raegewulke tuend eus eifach verfolge, mir sind nonig gnueg schnell mit fahre :-)
 
So simmer, wieder bi Raege, a eusem naechschti Ziel acho: Geelong. Mer haend euse Camper in Hinterhof vom Huus vo de Nicole und em David (die beide hemmer in Hobart – Tasmanie kenneglernt) gstellt und sit es paar Wuche wiedermal ime „richtige Bett" choenne schlafe! Zeme mit dene beide hemmer es paar Taeg verbracht und sie haend eus chli d'Umgebig zeiged. Daenn ischs via Highway no die letschte Kilometer bis nach Melbourne gange. Mir muend da glaubs noed erwaehne, dass es bi eusem Ufenthalt i dere Stadt praktisch nume graegnet haet :-)  Trotzem hemmer einiges choenne aluege, wenn au noed so viel wie mers urspruenglich haend welle. Obwohl eus d'Stadt sehr symphatisch gsi isch und eus vor allem s'moderne, fuessganger-fruendliche und ruhige Zentrum sehr guet gfalle haet (vom Rummel vo de Commonwealth Games 2006 hemmer nuet meh gspuert), sind mir es paar Taeg spoeter Richtig australischi Hauptstadt „gfluechtet". Die paar wenige Sunnestrahle immer wieder zwuesched de dunkle Wolche haend eus noed choenne laenger in Melbourne bhalte. D'Stadt isch uebrigens fuer ihres wechselhafte Klima (mal Sunne, mal Raege, daenn wieder Sunne und churz druf abe Raege - und das innerhalb vonere halb Stund) bekannt.
 
En Abstecher uf die winzigi Raymond Island haet au no muesse si. Det druff haend mir es paar Koalas hoch obe ide Baumchrone gseh, Wallabies sind vor eus durch de Wald ghuepft und vieli wunderschoeni, ganz farbigi Kakadus haend sich ide Baeum und ide Wiese umetummled. Um d'Faehre ume sind Pelikane gschwumme und mier haend de lohnendi Abstecher total gnosse!
Danke a eusi Australie-Fans diheime, die haend eus de Tipp gaeh! 

Und da gahts wiiters zum Reisebricht Canberra.