AU - New South Wales / Sydney

28. April – 3. Mai 2006 / Mir sind ide Welstadt SYDNEY - Usflug id Blue Mountains
 
Vo Canberra us ischs via Kangaroo Valley und em schoene Morton National Park nach Sydney gange. Mier haend ufm Weg id Weltstadt immer wieder ahghalte, churzi Wanderige gmacht und vo verschiedenige Lookouts us d'Region um eus ume vo obe aglueged. Bim einte Lookout simmer sogar no Zuege vome wunderschoene und total romantische Hochziit gsi. Vom Trauigs-Ort us haet mer en herrliche Usblick ueber s'Meer und d'Kuescht gha. Eifach traumhaft!
 
So haemmer eus daenn gege Abig vom 28. April ca. 4km vorem Zentrum ufme Campground in Sydney igrichtet und die naechschte Taeg chli planed.
 
Am Morge simmer ufgwacht und was haet eus erwartet: wiedermal Raege! Mer haend daenn grad nomal e Rundi gschlafe und haend daenn erscht churz vorm Mittag mit Bus und Zug de Weg is Stadtzentrum gfunde. Dete hemmer eus grad mal inen zweistoeckige, offnige Sightseeing-Bus gsetzt und so schomal en grosse Teil vo de Stadt choenne gseh. U.a. natuerlich au Darling Harbour und d'Harbour Bridge, Sydney Opera undundund. D'Petra isch zum erschte Mal idere Stadt und bereits nach dere Bus-Fahrt total begeistered!
Chli spoeter hemmer eus daenn uf de Weg zum Bondi Beach gmacht. Das isch DE Strand vo Sydney, bekannt wege de grosse Welle bzw. wege de Surfer und fuer d'Backpacker giltet Bondi Beach als Party-Ort. Durch das dass kei Hochsaison sprich bereits Herbscht isch, haets nueme so viel Luet gha und mier haend eus d'Ziit mit spaziere um d'Bucht und em schoene, wiise Sandstrand entlang, vertriebe. Echt toll, de viele Surfer zuezluege wo uf de Welle riitet!
 
Am naechschte Tag simmer ziemlich lang im Powerhouse Museum gsi, haend eus vo de luxurioese Atmosphaere vo Darling Harbour beriesle lah und sind es paarmal mit de Monorail umegfahre. Isch halt scho laessig, wenn mer d'Stadt vo obe chan aluege. Mir haend au de bekannti Paddy Market bsuecht und haend eus lang ide Umgebig vom wohl schoenschte und vo de Architektur her faszinierendschte Gebaeude vo de Welt ufghalte: Sydney Opera!
 
Waehrend eusem Ufenthalt inere unglaublich churzwiilige und interessante Stadt simmer uf de Sydney Tower ufe (haend det obe no en Film ueber ganz Australie choenne gseh), haend vom Botanische Garte us d'Skyline mit de Harbour Bridge und de Opera bestuunt, sind mit de Ferry zum Badeort Manly gfahre, haend e Tour durch d'Sydney Opera gmacht und haend eus eifach ueber die gueti Ziit i sonere tolle Stadt gfreut!
 
Chli Ziit ide Shoppingmeile hemmer au verbracht: im riesige Sony Central Shop hemmer au no en Bsuech abgstattet. Isch noed nume fuer de Thomas interessant gsi. D'Petra hat scho die zuekuenftigi Stereoalag, de Fernseh (nei, kein Beamer!) und wiiteri technischi Graetli fuer d'Wohnig diheime usgsuecht. Vo de Priise redet mer jetzt da noed....   Apropos technischi Graetli: in Canberra haets fuer eus e neui Digicam gaeh. Eusi „alti" haet en defekt womer uf de Reis nume ziemlich umstaendlich und choschte-ufwaendig choennti repariere. Vermuetli hemmer z'viel Bilder knipst.... jetzt dient sie halt no als Ersatzkamera und mir sind Bsitzer vonere neue, top moderne Sony-Camera.
 
Wenn mer scho in Sydney isch und Ziit haet, soet mer unbedingt mindestens ein Tag ide Blue Mountains verbringe. Mir sind zerscht waegem Wetter chli unsicher gsi, haends eus daenn aber glich noed naeh lah und haend e Tour is Usflugsgebiet westlich vo Sydney gmacht.Die „blaue Berge" sind es ca. 1'000m hoechs Plaeteau wo vorallem fuer ihri zahlriiche Baech, d'Wasserfaell und de grandiose Landschaft bekannt sind.
 
En Usflug id Blue Mountain lohnt sich uf jedefall. Es git so viel Wanderige z'mache i dem Gebiet, da brucht mer halt eifach meh Ziit als mir eus gaeh haend. Aber eus haets – nume scho wegem Wetter bzw. de Waermi – eifach Richtig Norde sprich Richtig Brisbane ufezoge und drum hemmer eus noed laenger i dem Gebiet ufghalte.

 

3.-7. Mai 2006 / ufm Weg vo Sydney nach Brisbane
 
A eusem letschte Morge in Sydney hemmer no diversi Flueg muesse bestaetige / umbueche. Isch ziemlich muehsam gsi und de Thomas hat doch mit enere Lady vo de Qantas sage und schreibe 50 Min. muesse telefoniere, bis sie gspured haet! Aber wie seit mer doch so schoen da in Down Under: „no worries" :-)

Daenn ischs endlich wiiters gange Richtig Norde, sprich id Waermi! Mier haend in Port Stephens eusi naechschti Uebernachtig planed gha. Port Stephens isch en Naturhafe, wo ca. 25km is Landesinneri ragt. Vieli ruhige Badebuchte und langi, wiise Sandstraend locked d'Luet a. Mier haend eus aber inere einsame Gegend en Campingplatz usgsuecht. Mier sind daenn au praktisch alleige gsi, 2 Familiene wo in chline „Wohnige" unterbracht gsi sind am andere Endi vom grosse Campingplatz und en „einsame Traveller" im Zelt, grad ide Noechi vo eusem Platz. De Typ hemmer daenn natuerli au bald kenneglernt, de Roland us Duetschland. Mir ihm hemmer eus sofort guet verstande und en tolle Abig verbracht und au veribart, dass mir eus spoeter ufm Weg de Kueschte entlang ufe nomal treffe werded. Man stelle sich vor: riesige Campingplatz, praktisch leer, direkt am Meer bzw. am Waldrand, Thomas, Petra und die neue Bekanntschaft. Da chan mer so luut si und so lang id Nacht ine dusse sitze ohni dass mer oeppert stoert. Noed emale es Possum-Mami mit Baby haend sich durch euses Lache gstoert gfuehlt und mier haend doch tatsaechlich immer wieder Bsuech vo Tierli gha!
 
Nachere ziemlich churze Nacht (Roland sei Dank *grins*) simmer daenn am naechschte Morge entsprechend mued wiiters gfahre. Mer haends aber nume grad bis Port Maquarie gschafft. Dete hemmer wieder en Campingplatz direkt am Meer gfunde, aber es haet recht viel Luet gha, drum haets eus noed so gfalle und mir sind nume ei Nacht bliebe.
 
Knapp 250km vor Brisbane, in Byron Bay, hemmer daenn no en Tag verbracht und de herzigi und alternativi Ort chli aglueged. Eus haet vor allem de Strand bzw. de oestlichschti Punkt vo Australie sehr guet gfalle. Will aber Byron Bay zu de erschte Party-Ort ghoert (wenn mer de Kueschte entlang vo Sydney nach Norde fahrt), simmer nacheme Tag wieder wiiters. Und zwar zum naechschte Party-Ort: Surfers Paradise :-) 
 Also vo de Skyline und de Menschemengi her, ziemlich haesslich. ABER:de schneewiisi, kilometerlangi Strand. S'kristallklare Meer. Wahnsinnig schoen! De Ort selber isch e Mischig us Las Vegas und Miami (fuer die wo schomal dete gsi sind) und bestaht vor allem us Hotels, Motels, Backpackers, Surf-Shops, Restaurants, Souvenirlaede, Discos und Vergnuegigsparks a la Orlando – Florida. Isch halt en Beton-Dschungel, ade Gold Coast. Da ane goend d'Australier id Ferie.
 
Und da gahts zu de Reisebricht im Territory Queensland (Brisbane und wiiters noerdlich ufe)