AU - Australian Capital Territory / Canberra

25. – 28. April 2006 / Hauptstadt Canberra
 
Mier haend „d'Kantonsgrenze" Victoria/New South Wales hinter eus bracht und euse vorlaeufig letschti Kueschte-Abschnitt haet fascht unberuehrti Natur beinhaltet. Bevor mer weg vo de Kueschte nach Canberra gfahre sind, hemmer daenn no ei Uebernachtig igleit, direkt am Meer. In Batemans Bay hemmer en wunderschoene Sunneuntergang ueberem Meer doerfe gseh.
 
Chum ischs via Landesinnere gange, haet eus e bunti, herbschtlichi Natur und e kurveriichi Strass erwartet. Aber fuer eus Schwiizer isch das ja kei Sach gsi. Fuer d'Australier sind so "Berge" mit vielne Kurve scho oeppis speziells (d'Hauptstadt befindet sich ufeme ca. 600m hoeche Plateau). Aja, noed z'vergesse: en blaue Himmel und d'Sunne haend eus begleitet!
 
Gege Mittag simmer ide australische Hauptstadt Canberra sprich im Australian Capital Territory, acho. Mer haend natuerli grad muesse uf de Telstra Tower ufe, damit mer e Uebersicht vode City und de Region uebercho haend. I de naechschte Taeg in Canberra hemmer u.a. de Botanischi Garte aglueged, sind im spannende War Memorial gsi, haend e Fuehrig durchs beidruckende Parliament House gmacht und allgemein d'Stadt beschnuppered. Mir haend viel Ziit am kuenschtliche See bzw. ide verschiedene Parkalage verbracht und richtig Freud gha am blaue Himmel und de bunte Herbschtblaetter vo de vielne Baeum.
 
Da no es paar „technischi Infos":
Wie isch es zu de „kuenschtliche Stadt" cho?
1901 haend sich d'Kolonie vo Australie zum Commonwealh of Australia vereinigt und will mer sich als Hauptstadt noed haet choenne zwuesched Sydney und Melbourne einige, haet mer halt eifach e nagelneui Stadt gruendet. Usm Staat New South Wales isch e knapp 2'500 km2 grossi Flaechi abtrennt worde, Australian Capital Territory isch gebore. Die zuekuenftigi Hauptstadt „Canberra" treit de Name wo ide Sprach vo de Uriwohner Aborigines „der Treffpunkt" beduetet.
 
Canberra isch i erschter Linie e Verwaltigsstadt. Nebed de Dienstleistige spielt au de Tourismus e grossi Rolle. S'Kultur- und Museumsagebot isch riesig, und vorallem s'National Museum of Australia isch e Hauptattraktion fuer australischi und nationali Bsuecher. Rundum d'Stadt ume befindet sich Nadelwaelder und Buschland.
 
Reisebricht Sydney und Region