AU - Queensland / Brisbane, Cairns

 

7.-13. Mai 2006 / Brisbane – Hervey Bay – Usflug uf Fraser Island
 
Eus isch gseit worde, mer choengi sehr guet miteme Campervan id City vo Brisbane fahre und au dete parkiere. Ok, haend mir das doch grad mal welle probiere. Es isch daenn bim probiere bliebe.... Eusi „Wohnig" isch eifach z'hoech fuer jedes Parkhuus dete und d'Parkplaetz selber sind natuerli alli schoen bsetzt gsi. Ziemli fruschtriert haend mir daenn d'Strass Richtig euse Campground gsuecht und sind so zuefaellig ame Hinterhof ohni Parkverbots-Tafle verbi cho. Tja, was macht mer da: parkiere, usstiege, City aluege. Es paar Stund spoeter haemmer daenn scho chli es mulmigs Gfuehl gha, aber zum Glueck isch euses Autoeli doch no an Ort und Stell gstande, ohni Schade, ohni ibrochnigi Schiebe.
 
Am erschte Tag hemmer doch scho viel vo de City choenne gsi. Mer sind daenn am naechschte Tag vor allem mitm Boot unterwegs gsi und haend au no de Botanischi Garte und die wunderschoeni Promenade am Fluss entlang gnosse. Brisbane – vo de Aussis liebevoll „Brissie" gnennt, isch e schoeni Stadt. Es git vieles z'gseh, aber wenn mer kei Ziit haet zum det ane gah, verpasst mer trotzdem noed viel. S'Wetter da afangs Herbscht isch fuer eus genial. Schoen warm, noed heiss. Und vorallem: kei Raege waehrend eusem Ufenthalt!
 
Wie scho es paar Tag vorher, haets eus wieder wiiters nach Norde zoge. Mier haend dann vo Hervey Bay (womer en superschoene Campingplatz verwuetscht haet, de schoenschti wo mier bis jetzt in ganz Australie gha haend: viel Palme, chlini Teich mit schoene Blueme, no meh Lorikeets und Ente und anderi Voegel als suscht amigs, tolli Duschene, alles suuber und eifach perfekt zum es paar Tag bliebe) us en 2taegige Usflug uf Fraser Island gmacht. Das isch oeppe so abgloffe:
 
Am Morge frueh simmer mit ca. 20 anderne uf d'Faehre nach Fraser Island. Euse Tourbus isch en riesige, klimatisierte 4x4-Bus gsi. Das isch noetig, um uf dere Island umezcho. Sie bestaht naemli nume us Sand, isch somit die groeschti Sandinsle vo de Welt. Da gits kei geteerti Strasse. D'Insle ghoert sit 1992 zum Weltkulturerbe vo de UNESCO und isch 104km lang, ade breitischte Stell 27km und ade schmoelschte Stell 5km breit. De Name „Fraser" berueht ufere abentuerliche Gschicht vome Capitain wo so gheisse haet. De isch mal, zaeme mit sinere Ehefrau, da gstrandet und vo de Iigeborene (wos damals no gaeh haet uf dere Insle) gfange gno worde.....
 
Fraser Island isch zu 90% bewachse, zum groeschte Teil mit Raegewald. Das chan mer ja fascht noed glaube, will ja alles  nume us Sand bestaht. Aber es isch tatsaechlich eso. Glichziitig gits knapp 80 (!!) Baech und es paar Suesswassersee. I dene haemmer daenn au doerfe bade. D'Dingos sind die Reinrassigschte wos git uf de Welt... Allgemein gits ziemli viel Tier uf dere Insle. Es paar devo hemmer gseh. D'Petra isch allerdings happy gsi, dass sich weder uf de Wanderig im Raegewald, no uf de „Strass", no ufm wenig beluechtete Campground keini vo dene vielne, zum Teil 2m lange Schlangene, zeiged haet...
 
Mir haend uf jedefall alli sehenswerte Puenkt vode Insle choenne gseh, haend inere Zeltstadt uebernachtet (Luxus-Zelt, mit Holzbode und eme Doppelbett: genau so stellt sich d'Petra s'zelte au vor!), haend ide schoene, glasklare See baded und haend es vor x Jahre gstrandets, ziemli roschtigs Schiff bestuunt. Uf de einte vo zwei Raegewaldwanderige sind Bluetegel a verschiednige, halbnackte Bei gchlebed (unter anderem au bim Thomas). Nebed dene harmlose Tierli simmer au no anderne begegned: eim vo dene reinrassige Dingos, Manta Roche, Seeadler und diverse Spinne. Drunder au die giftige Red Back (isch vo eusem Tourguide bestaetigt worde).
 
De Usflug isch wuerkli einmalig gsi! Einduetig empfehlenswert, mindestens 2d soett mer sich aber scho Ziit naeh!
 
Am Abig ischs daenn grad wiiters gange: ime irische Pub in Hervey Bay haemmer mit de ganze Gruppe de tolli Trip usgluetet und de Roland (wo mier es paar Tag vorher in Port Stephens troffe haend) isch au no bi eus mitdebi gsi. Dasmal hemmer nueme euse Campground fuer eus allei gha, aber es isch total laessig dass mier eus nomal haend choenne treffe.


13. – 20. Mai 2006 / Lady Elliot Island - Sailing Whitsundays
 
Will eus de Usflug uf d'Fraser Island so guet gfalle haet, hemmer es paar Kilometer wiiter noerdlich gfunde, mached mer grad nomal en Insel-Usflug. Mier haend daenn also grad churz nach de Akunft in Bundaberg im Visitorcenter fuer de naechschti Tag Lady Elliot Island bueched. En tuere Gspass, aber vo es paarne anderne Traveller hemmer erfahre, dass sich das total lohnt.
 
Mier haend ufm Campground eus no churz mit de Silke und em Andi (Fraser Island) troffe und fuer de naechschti Abig abgmacht. Sie haend noed choenne mit eus Lady Elliot bsueche, aber umso meh haend mir ihne daenn z'verzehle gha. Mir verzehlets eu au:
 
Am Morge um die halbi nueni isch de chlini Flueger wo Platz fuer 10 Pers. haet, in ca. 40 Min. uf die suedlichschti Insle vom Great Barrier Reef gfloge: Lady Elliot. Im Gegesatz zu de Whitsunday-Inselgruppe, dadezue choemmed mer spoeter daenn no, bestaht die Insle us echte Coral Cays und isch deshalb wunderschoen zum tauche bzw. schnorchle. Mier haend uf dere knapp 40ha  winzige Insle en tolle Schnorchelgang gha, haend debi vieli bunti Fisch und sogar e grossi Schildchrot choenne gseh. D'Koralle sind noed so farbig gsi wie anschiinend suscht bim Great Barrier Reef, aber trotzem wunderschoen. Vorallem, will mir beidi das zum erschte Mal im Lebe gseh haend! Wiiters hemmer no Glegeheit zume „Reef Walk" gha. Da lauft mer mit Turnschueh bewaffnet ums Reef ume, nume es paar Meter vom Strand entfernt. Das haet eus d'Glageheit gaeh, zum d'Koralle vome andere Punkt us gseh, und au debi no einiges drueber z'erfahre. D'Seegurkene, en Art „Reinigungsmaschine" fuer s'Meer, haets vor allem de Petra atah. Die Dinger gsehnd irgendwie haesslich us, sind aber vollkomme harmlos!

Obwohls es paarmal chli graegnet haet, haemmer wieder en Hoehepunkt meh uf eusere Reis! Lady Elliot, ein Muss! Nume scho will d'Insle en Teil vom World Heritage Marine Park isch und unter Naturschutz staht.
 
Nach some schoene und erholsame Tag isch danach wiedermal chli Driving agseit gsi. Mier haend in ca. 10h e Strecki vo 750km gmacht (inklusive verschiednige Stopps und eme Abstecher nach Town 1770 – da isch de James Cook am 24. Mai 1770 gstrandet und haet „Australie entdeckt"), sind verbi a riesige Zuckerrohrfelder und haend jetzt nume no knapp 210km zu eusem naechschte Ziel: Airlie Beach!
 
Und scho waehred mer bi eusem vorlaeufig letschte Reise-Erlebnis: en Segelturn ide Whitsundays.
A eusem erschti Abig in Airlie Beach hemmer eus mit es paarne vom Fraser-Trip troffe (Hanni und Dani us Duetschland, Sarah, Patrick und Klein-Kimi usm Appezell) und en luschtig Abig mit viel Popcorn verbracht. Am naechschte Morge bzw. Mittag ischs losgang, uf euse erschti Segelturn.
S'Meer da ide Region schimmered ime unglaublich intensive Tuerkis und Aquarmainblau. Chan mer da ufen Segelturn ide schoenschte Landschaft vo Queensland – Whitsunday Islands – verzichte? Mier haends also noed choenne lah.
 
Mir sind 2 volli Taeg lang ufm Meer use gsi. Zerscht haet viel gregnet und gwindet. Ihr wuessed was das beduetet, oder? Viel Wind = hoechi Welle = sehr schaukelnds Schiff = 14 Luet fascht seekrank. Wenn mer sich das noed so gwoehnt isch, schono speziell. Thomas und ich haend beidi mal chli Mueh gha. Unde im „Trochne" haets unglaublich fescht gschaukled, uf Deck sprich im Raege obe haets logischerwiis au so fescht gschaukled. Aber mit de Seebrise ischs daenn doch guet gange und niemert haet muesse Fischli-fuettere :-)
 
Die erschti Nacht uf some Segelboot isch schono speziell. Es haet eifach fescht gwindet. D'Welle haend naebed eusne Bett alles gaeh, de Anker haet dusse entsprechend as Schiff anetaetscht und es haet gschaukled. Aber mer gwoehnt sich ja a alles :-)
 
Wo de Captain am Morge am sechsi de Motor gstartet haet, isch alles wieder vergesse gsi und mier sind bald scho uf Deck goge die wunderbari Morgestimmig bestuune. Wahnsinn, eifach nume s'Boot, es paar Luet druf, s'Meer und uf de einte Siite d'Whitsundays!
 
Mier haend natuerli au choenne 2x goge Schnorchle und so s'Great Barrier Reef vonere andere Siite gseh als uf Lady Elliot Island. Es isch eifach unglaublich schoen gsi! Koralle, vieli Fisch, vieli Farbe. Mer findt da eifach fascht kei Wort defuer! 
 
Luschtigerwiis hemmer daenn bi eusem einzige Landgang no Hanni und Dani gseh (die beide vo Fraser Island) und mitene no chli choenne plaudere. Und d'Arabella womer vor knapp 2 Moenet uf Kangaroo Island troffe haend, isch eus au no ueber de Weg gloffe :-)
 
Mir haend uf jedefall ganz e tolli und luschtigi Ziit ufm Segelboot Dreamcatcher gha. Haend es paar laessigi Luet (us de Schwiiz) troffe und haend mit dene au no de gestrigi Abig und de huetigi Vormittag verbracht. De Alain und de Marco sind huet wiiters mitm Bus uf Cairns und d'Miriam isch uf Sydney gfloge. Mier hoffed, dass mer eus diheime daenn mal choend treffe! 
 
Wow, sooo aktuell isch euses Reisetagebuech scho ziemli lang nueme gsi. Mier sind jetzt es paar Stund im Internet gsi, haend eus d'Finger fascht wundtippt (neinei, wund sinds no lang noed.....) und hoffed, dass ihr Freud haend a eusne Bricht! Nume so machts naemlich wuerkli Spass und de Ufwand lohnt sich au. D'Foeteli folged daenn no, sobald mer wieder e Moeglichkeit haend!

21.-29. Mai 2006 / Tauchgang, Tablelands und Cape Tribulation

Nachdem mir es paar Tag ide Region um Airlie Beach (vo da us isch euses Segelschiff gstartet) verbracht haend, ischs daenn wiiters gange Richtig Norde. Mir sind durch Gebiet mit Gmues- und Obstplantage gfahre (vorallem Bananefelder haets viel gha) und sind daenn in Townsville acho. De Ort giltet - nebed Cairns - als Zentrum vom Norde. Vo da us haet de Thomas es Wracktauche gmacht. Das englische Schiff "Yongala" befindet sich in 15-33m Tuefi und liegt ca. 13km vor de Kueschte. Das Wrack isch bevoelkered vo Dutzende giftige Seeschlange, zum Glueck sinds noed agfriffsluschtig. Rings ums Wrack ume isch d'Meeresfauna- und flora lebendiger als i allne benachbarte Riifs. Es giltet als beschts Taucherlebnis vo ganz Australie. Sowas haet sich de Thomas natuerli noed doerfe entgah lah! D'Petra hat daenn de Tag mit chli laedele, lese und eme Bsuech im Aqua-Museum, s'einzige  Aquarium miteme echte Riff, umebracht. Am Abig isch daenn en glueckliche, aber sehr muede Thomas vom tauche retour cho. Er isch so mued gsi, dass er grad nachm Znacht um die siebni ume isch go schlafe. S'Tauche isch wege de starke Stroemig und de hoeche Welle sehr astrengend gsi. Dezue isch no Weg vo total 6h cho. Das haut au en starche Maa um :-)  Aber s'Erlebnis, inklusive Seeschlange, Nemos und vielne, vielne riesige Fischschwaerm, haet sich fuer ihn definitiv glohnt!
 
Nach Townsville simmer de Kueschte entlang via Ingham nach Mission Beach gfahre. Dete simmer Zuege worde vo de wahnsinnige Zerstoerige durch de Zyklon Larry Endi Maerz. Isch scho schlimm, was de i knapp 3h agrichtet haet! Massehaft Regewald, Palme, Banane- und Zuckerrohrfelder etc. sind zerstoert...
Danach ischs Landesinnere gange, id Tablelands. Quasi s'Hochland bi Cairns. Det hemmer eus sofort wohl gfuehlt, d'Gegend haet naemlich sehr de Schwiiz gliche. Mir sind daenn total zuefaellig bime Schwizer Restaurant (Nicks Restaurant) verbi gfahre und haend natuerli muesse dete go Znacht esse. Isch ganz en luschtige Abig worde mitm Nick und sine Luet, mer haend sogar no mitenand chli Musig gmacht. De Thomas haet d'Trompete gspielt und d'Petra isch ihrem Instrument untreu worde :-)
 
Wiiters simmer daenn nach Kuranda gfahre. De Ort befindet sich ganz noech vo Cairns und isch bekannt will er sehr idyllisch im Regewald liegt und mer en u.a. chan mitere schoene Zugfahrt und ere Seilbahn erreiche. Mir haend eus daenn chli vo der schoene Atmosphaere dete beriesle lah, haend die bekannte Barron Falls ide Barron River-Schlucht besichtiged, sind eimal meh im Regewald go spaziere und nach es paar Stund wiiters wieder ad Kueschte abe. Isch no luschtig, de Australier sind so "bergigi Strasse" noed so gwoehnt. Fuer eus Schwiizer isch das natuerli kei Sach. Mier amusiered eus amigs wenn ueberall staht "achtung, sehr kurvige Strasse" "aufpassen, steile Bergstrassen" :-)
 Aber immerhin: de Weg id Tablelands bzw. Vo Kuranda wieder ad Kueschte abe isch doch scho bitsli kurvig gsi.
 
Vom Kueschteort Port Douglas us (da haet de Bill Clinton anschiinend au scho Ferie verbracht) simmer daenn no chli in Norde gfahre, zum Cape Tribulation. De groeschti Teil vo dem Cape isch als Nationalpark usgwise und uf d'UNESCO-Lischte vom Weltnaturerbe vode Menschheit gsetzt worde. En Teil vo dem fascht unberuehrte Guertel vom tropische Kueschteregelwald haend mir besichtiged. Mitm Cape Tribulation simmer am noerdlichschte Punkt vo eusere Rundreis durch Australie acho.

30. Mai – 2. Juni 2006 / letschts Australie-Ziel: Cairns

Mir sind nach total 3 Moenet Australie, dadevo 2 Moenet mitm Camper, sicher und ohni Unfall in Cairns acho. Cairns isch eusi letschti Destination i dem wunderschoene Land. Mir wohned im YHA und gnuessed jetzt no eusi Taeg da, tuend die viele Idrueck no chli verarbeite, de Ort aluege, s'feine Esse im Swiss Inn (womer mi de Lilian und em Markus us Wassen UR sind go Znacht esse) gnuesse, alli Souvenirs per Poscht heischicke und eus seelisch uf euses naechschti Ziel vorbereite.
Am Samstig am Morge frueh gaht euse Flueger uf Brisbane. Leider haends de Aschlussflug g'aendered und mier muend 5h warte bis es wiiters gaht. Aber naja, halb so wild, mir haend ja kei Stress :-)
 
Australie, en riesig grosse Kontinent mit ere grosse Aziehigschraft und ere spezielle Kultur. En Kontinent mit ca. 20 Millione Iwohner. En Kontinent  mit de Uriwohner Aborigines und durch d'Groessi vo ca. ganz Europa en Kontinent mit riesige Distanze.
 
Mier haend soviel erlebt und gseh. Nume allei mitm Camper simmer meh als 11'000km gfahre. D'Landschafte (inklusive Westaustralie und Tasmanie womer mitm Mietauto bereist haend) sind unglaublich abwechsligsriich. Riesigi wissi Sandstraend, Buschlandschafte  mit luechtend rotem Sand, unglaublichi Kueschteabschnitt, tropische Regewald, trochnigi Wueschti, d'Einsamkeit und s'Mystische sowie au einsami Siedlige im staubige Outback ghoered genau so zu Australie wie d'Staedt vo dem Land. Bsunders Sydney. De Ort wo de Ruef als eini vo de schoenschte Staedt uf de Welt ganz sicher verdient haet. Au z'erwaehne die westlichschti Stadt, Perth. Da haend mire us vo Afang a eifach wohl gfuehlt.
 
Noed z'vergesse natuerlich s'Wahrzeiche vo Australie: de Riesemonolith Uluru (Ayers Rock). Und die ueberwaeltigendi und farbeprachtigi Pflanze- bzw. Tierwelt. Die viele bunte Voegel, die bekannte Kaengurus und Koalas, giftigi und ungiftigi Schlange und Spinne, Krokodil undundund.
 
Es Land mit fruendliche und vorallem sehr hilfsbereite Mensche. Australie, es Land wo eifach fuer alli oeppis buetet. Egal ob Rucksackreisende mit schmalem Budget oder Luxusreisendi mit viel Geld zum usgaeh, ob fuer Alleinreisendi oder Familie mit chline Chind: es buetet wuerkli fuer alli oeppis.
 
Mir sind gluecklich und naehmed vieli positive (aber au es paar truurigi) Iidrueck mit und freued eus jetzt uf s;naechschti Ziel i eusem glebte Reise-Traum: Fidschi!