USA - Hawaii

18. Juni - 6. Juli 06 / Hawaii  
 
Nachere eher churze Nacht simmer am Morge frueh ide Hauptstadt vo Hawaii (Insle Oahu) glandet. D'Kollegin vom Thomas haet eus miteme "herzlich Willkomme uf Hawaii" uf Schwiizerduetsch empfange. D'Sabine wohnt scho sit knapp 10 Jahr uf Hawaii. Nach eme chline Plauderstuendli sind mir daenn i eusere Unterkunft direkt am Waikiki Beach acho und haend eus bald mal uf d'Socke gmacht und sind d'Umgebig und de wohl bekanntischti Strand go aluege. Wahnsinn, die viele Luet (nach Fidschi sind mir eus einsami Straend gwoehnt)!   
 
Wie das so isch bim Reise: neue Ort = neu orientiere = neu organisiere. Mir haend das gmacht ide naechschte Taeg in Honolulu und zeme mitm Internet bzw. Tipps vo anderne Traveller eusi Hawaii-Rundreis bueched. Das anschiinend guenstige Reisebuero isch nuet gsi fuer eus. Das isch no viel tuerer gsi als suscht scho alles via Internet-buechige. Allgemein isch uf Hawaii alles unglaublich tuer, Hostels, Automieti (ohni Auto chunnt mer usserd uf Oahu praktisch gar noed us), Esse. Mer haend en Iheimische troffe wo gmeint haet, dass mer uf Hawaii s'schoene Wetter und die agnehme Temperature halt au muen mitzahle. Haet oeppis....  
 
Highlight uf Big Island, eusem erschte Stopp nach es paar Tag Oahu:
Da ischs ganz sicher de no aktivi Vulkan inklusive em Volcano National Park gsi. Wahnsinnig idruecklich, ueber ganz jungs Lava z'laufe (letschi Usbruch ide 90er Jahr). Sehr speziell, vo wiitem z'gseh, wie s'Lava unterirdisch is Meer fluesst und so riesigi Wolke am Himmel entstoend. Wer scho uf de Insle Lanzarote gsi isch, chan sich ungefaehr vorstelle, was mer uf Big Island chan gseh.  
 
Highlight uf Maui, nebed Oahu die bekanntischti Insle vo de Hawaii-Gruppe:
Uf Maui haend mir en unglaublich schoene und unvergessliche polynesische Abig choenne verbringe. Mir sind mit feinem Esse und ere schoene Tanz-/Musigshow (Hawaii, Neuseeland, Samoa und Tonga) verwoehnt worde. S'schoenschti a dem bereits tolle Abig isch d'Kulisse gsi:en traumhafte Sunneuntergang, kitschig,wie mer sich das fascht noed chan vorstelle!
Wer uf Maui gaht, muen natuerli ufm erloschne Vulkan Haleakala de Sunneufgang go aluege. Au mir haend eus das Spektakel vo de Mutter Erde noed entgah lah und sind am Morge am halbi drue losgfahre. Ide stockdunkle Nacht simmer uf knapp 3'000m obe acho und haend no e gueti Stund muesse warte, bis sich ganz en fiine, rote Streife am schwarze Himmel zeiged haet. De Sunneufgang isch eifach oeppis wo mer muen gseh! Obwohls det obe um die Tagesziit unglaublich chalt isch, mier haend under 10 Grad gha.
Als Abschluss haend mir eus no en Helikopterrundflug (mier haend Glueck gha und en tolle Priis gfunde) goennt und so die Insle no us de Vogelperspektive choenne gseh. Die viele Surfer und die hoeche Welle muen mer da au bi Maui au no erwaehne. Faszinierend dem Sport bzw. dem Lifestyle zuezluege.  
 
Highlight Kauai (aeltischti und deshalb gruenschti Insle - Garteninsel):
Uf dere Insle wachsed wunderschoeni, bunti tropischi Pflanze und dichte Raegewald. Obwohl mir ime Raegewald scho vieli Stunde verbracht haend (Malaysia, Neuseeland, Australie), ischs immer wieder schoen, de fuer eus spezielli Wald z'gseh und z'gspuere. Im Gegesatz zu de anderne Insle haend mir da menscheleeri Straend gfunde und eus vor allem ade Westkueschte verwiiled. Ganz ide Noechi vome riesegrosse Beach isch de Waimea Canyon, quasi "little Grand Canyon". Wie idruecklich de gsi isch, gsehnd ihr bi eusne Bilder. Danke eme Helikopterrundflug haend mir choenne de Ursprungsort vode Insle gseh. De Ort, wo vor vielne Millione Jahre s'Lava usbroche isch und d'Insle gformt haet.  
Da no e chlini Story zu Kauai:
Mit eusem Rueckflug haet nach Oahu/Honolulu haets noed ganz so klapped wie mir haend welle. De (letschti) Flueger isch doch tatsaechlich ohni eus abgfloge. Wie das gange isch, wuessed au mier noed... Ironischerwiis haet die komischi Fluggsellschaft "go!" gheisse. Dass die das so ernscht meined, haend mier au erscht erfahre,nachdem mir einsam am Flughafe ghoecked sind. E unglaublich netti und hilfsbereiti Agstellti vom Flughafe haet die ganzi Situation beobachtet und eus ihres Sofa diheime abote. Mir hetted suscht naemlich muesse am Flughafe uebernachte (es isch bereits um die 22h und de Flughafe isch scho fascht gschlosse gsi). Lange Rede kurzer Sinn: mier haend s'Agebot vo de Keren agno und dadebi ihri beide Toechtere Rachel und Beca no kenneglernt. Die Spontanitaet und d'Gastfruendschaft vode Keren haet eus wuerkli fascht d'Sprachverschlage! Vorallem au, will sie eus nachere ziemlich churze Nacht am Morge am foifi wieder an Flughafe gfahre haet!  
 
Highlight Oahu:
Ganz klar: d'Sabine und ihri Familie wieder zgseh (bzw. fuer d'Petra sie kennezlerne) und eus vo ihre en Teil vo ihrem Dihei d'zeige lah. Wer uf Oahu isch, laht sich d'USS Arizona War Memorial noed entgah. Au mir haends gschafft und haend no Tickets uebercho und so Pearl Harbor choenne und s'Memorial choenne besichtige. Unglaublich idruecklich. Und glichziitig schockierend, was da am 7. Dezember 1941 passiert isch (Bombeagriff vo de Japaner uf d'Pazifikflotte vo de Amerikaner. Voellig unerwartet us de Luft, de erschti Agriff i dere Art wos je gaeh haet).
D'Ananasplantage vo de bekannte Firma DOLE haend mir zeme mit de Sabine und ihrne beide Chind besichtiged. Isch sehr idruecklich gsi. Vor allem, will mier diheime eusi Ananas eifach im Migros goend go poschte und eus gar noed ueberlegged, woher die Fruecht eigentli choemmed :-)
Ja, und natuerli de Waikiki Beach isch au es Highlight gsi uf Oahu. Hat sehr viel Luet gha a dem Strand, aber d'Stimmig, d'Strandpromenade, die viele Surfer, d'Welle und die viele Luet mit und ohni Boogiebords sind halt schono speziell. Da ide Noechi haend mir uebrigens au de amerikanischi Nationaltag am 4. Juli verbracht. Und wie fiired d'Amerikaner de Tag? Natuerlich mit BBQ und Fuerwerk!  
 

* ALOHA *  
 
Alles in allem haet eus d'Inselgruppe im Pazifik sehr guet gfalle! Mier haend die vielfaeltigi Natur gseh und au das wo Hawaii beruehmt gmacht haet:s'Surfer und d'Sandstraend!   Es isch e supertolli Ziit gsi, vorallem au mit bzw. dank de Sabine, ihrem Maa Daniel und de beide Chind Madison und Ashton!