Canada

6. – 23. Juli 06 / Rundreis British Columbia, West-Kanada
 
D'Ziit vergaht unglaublich schnell... scho simmer unterwegs vo Hawaii us via Los Angeles nach Vancouver. Scho werded mer d'Eltere vom Thomas, Rita & Michael, atreffe und mit ihne eusi knapp 6 wuechigi Reis durch Westkanada und –USA atrete. In L.A. gsehnd mir am Flughafe nach ziemli gnau 9 Moenet Uslandufenthalt z'erschti Mal wieder en Flueger vo diheime: e Swiss-Maschine! Schoens Gfuehl, de Flueger mitm Schwiizer Chruez d'gseh!
 
D'Reis bis nach Vancouver isch sehr guet verloffe und mir sind puenktlich glandet. Wenigi Minute spoeter sind eusi seniors, wie mir Rita & Michael im Lauf vo de gmeinsame Reis liebevoll nenned (zur Info: in Kanada und au ide USA haend d'Luet ueber 60gi bi Iitritt vo Nationalpaerk, Musee, Kinos, Vergnuegigspaerk, Hotelzimmer etc. oftmals e Verguenschtigung. Und de Rabatt isch mit „seniors" entsprechend gkennzeichnet) vo de Schwiiz us au in Vancouver acho. Ihr choend eu sicher vorstelle, dass d'Wiedersehensfreud riesig gsi isch!!! Mir haend dann grad euses Mietauto entgege gno, sind zum vorreservierte Hotel gfahre und haend vor de wohlverdiente Nachtrueh grad no chli muesse aperoele!
 
Am Tag druf hemmer d'Rundreis gstartet und sind ab uf d'Faehre, die het eus uf Vancouver Island bracht.
In Victoria, de Hauptstadt vo British Columbia, hemmer zerscht nachere Unterkunft gsuecht. Mal chli luege, was es dete git und wie mer zwei zwuescheziitlich erfahreni – und wohl i.S. Uebernachtig nueme gross aspruchsvolli – meh oder weniger Budget-Traveller und zwei Neuling i Sache Reise guet i die glich Unterkunft bringt. Nach eme Wiili „Zimmer-Shopping" hemmer daenn unglaublich Glueck gha und es subers Hotel fuer en guenstige Priis zmitzt in Victoria gfunde. Mer haend schnell festgstellt, dass es Hotel meistens guenschtiger isch als es Zimmer ime Backpacker/Hostel!
 
I de naechschte Taeg simmer d'Stadt chli gnauer aglueged. Sie erinnered eus irgendwie a England, ueberall grueni Gaerte und Hueser im viktorianische Stil. De Hafe isch ganz herzig gstaltet: vieli bunti Bootshueser und vieli chlini Restaurants. Mer haend en Bsuech im Pacific Rim Nationalpark gmacht, sind dete ame wunderschoene Strand gsi (de Weg det hi isch durch Wald, Wald und nomal Wald gange. Ufm Rueckweg hemmer sogar vo ganz wiit weg euse erschti Baer choenne gseh!) und haend in Tofino ime Restaurant direkt am Meer feine Lachs g'esse.
Als kroenende Abschluss vo Vancouver Island haend mir e Whale Sightseeing-Tour gmacht. Dick ipackt i Winterjagge und Kopfbedeckig simmer ufme Boot bis fascht nach Seattle gfahre. Die begehrte Tier haend sich im Moment grad dete ufghalte. Nach churzem umeluege haet mer au scho de erschti Wal gseh. Unglaublich imposanti Tier! Mir haend ganzi Familiene choenne bestuune. Leider ischs sehr schwierig, die Lebewese ufme Bild fescht z'halte. Drum gits au noed viel gueti Fotene im Fotialbum ine.
 
Bald ischs wieder wiiters gange und via Vancouver simmer nach Whistler  gfahre (eusi Unterkunft: s'letschte Zimmer ide Jugendherberge HI Hostelling International. Die grossi Blockhuette isch zmitzt im Wald, direkt am wunderschoene See glege und daher unbedingt z'empfehle). Whistler isch noed nume bi de Iwohner vo Vancouver als Skigebiet beliebt. Und: im 2010 findet da d'Winterolympiade statt. Entsprechendi Souvenirs chann mer bereits jetzt i de Laede poschte :-)
Whistler Village gseht herzig us, alles isch recht modern und alli Hueser im Zentrum passed zeme. Mir haend bald en Usflug uf de „Signal Hill" gmacht, vo de obe haet mer en super Blick uf Whistler und ufs gsamti Tal. De bescht aber: ufm Berg obe haets teilwiis no SCHNEE gha!!! Nach de wisse Straend vo Hawaii innerhalb vo wenige Taeg in Schnee vo Kanada, das isch fuer d'Petra und de Thomas scho bitsli „Kulturschock" gsi! Aber nichts desto trotz hemmer grad muesse chli im Schnee go umegumpe! Zudem sind mer ufm Berg obe au go wandere und haend wunderschoeni See und unglaublich viel Wald gseh.
 
Via Clearwater bzw. Wells Grey Nationalpark simmer witers gfahre und haend no ufm Blue River e spezielli Bootstour gmacht, womer Baere, Hirsch und Renntier chan gseh. Oder besser: choennti gseh. Leider haend mir bis uf es paar Adler-Nescht keis vo dene Tier entdeckt. Dafuer daenn um so schoener grad nebed de Fahrbahn ufm Weg nach Jasper: en vermuetlich junge Schwarzbaer! Mir haend mitm Auto choenne ahalte und nume wenigi Meter vo eus entfernt isch de „Teddy" im Gras gstande, haet chli ade Blueme umegschnueffled und sich absolut noed vo eus stoere lah! So en Ablick hetted mir eus also nie ertraeume lah!
 
Via Medicine Lake, Maligne Lake und Moose Lake isch eusi Fahrt nach Jasper gange. Wieder en bekannte Ort ide Rocky Mountains, rundume wunderschoeni Berge und: viel Wald. Mir sind au da mit de Gondle uf en Berg ufe, the Whistlers, Mt. Edith Cavell, und haend choenne e wunderschoeni Ussicht gnuesse.
 
Nach Jasper hemmer eus Lake Louise, de Ort mitm glichnamige See, besichtiged. Vor allem de smaragtgrueni Gletschersee haet eus dete Idruck gmacht. S'prachtvolle und riesige Hotel direkt am Ufer isch es Wahrzeiche vo dem Gebiet.
 
Bald drufabe simmer im Zentrum vo de kanadische Rockies acho, Banff. De Ort erinnered eus a es tuers Skigebiet i eusem Heimatland, entsprechend sind da au d'Priise. Aber defuer gfallt eus d'Umgebiet umso besser: vieli See, Gletschter, Tierwelt (in Banff soettis bsunders viel Baere und Moose - e Art Elch - gaeh). Au da wieder: en Bsuech ufm Huusberg mit de Gondola. In Banff treffed mer superspontan en ehemalige Nachbar vo Thomas & Family. De Felix isch vor ca. 12 Jahr uf Kanada usgwandered und schaffed zur Ziit im Hotel Lake Louise. Sini Frau, d'Valerie, im andere Prunk-Hotel vo de Rocky Mountains: Fermont Springs Hotel. Mier haend mit dene beide en gmuetliche Zmorge verbracht und eus daenn nachher au noed naeh lah, s'Hotel wo d'Valerie schaffed, z'besichtige. Au da chunnt eus euses Dihei in Sinn: Hotel Palace in St. Moritz. Wunderschoen, protzig, und Priise, so wie mir sie eus noed leiste choend. Defuer hemmer dete viel Bilder choenne mache und au d'Erdmaennli nebed em Hotel i de Wiese inne haend gern fuer eusi Kameras posiert. Sind total herzig die Tierli. Mer muen nume gnau luege, und scho gseht mer ueberall die chline Choepf zur Erde us luege.
 
Wo mir in Salmon Arm zur Uebernachtig aghaltet haend, simmer bereits scho ufm Rueckweg nach Vancouver gsi. Salmon Arm befindet sich naemlich ca. uf halbem Weg Vancouver und Calgary (hinter de Rocky Mountains). Dete hemmer uf en heisse Tipp vo Kollege de Andy und d'Lisa bsuecht. Es Ehepaar, wo vor mehrere Jahr d'Schwiiz verlah haet und s'Viewpoint Motel / Caravanpark fuehred. Mir haend eus sofort superwohl gfuehlt. Wo daenn no neui Gaescht uftaucht sind und die sich als Bekannti us eusem Wohnort entpuppt haend, isch d'Freud no groesser gsi! En luschtige und sehr churzwiilige Abig bi feinem Esse isch sehr schnell ume und leider haend mir euse Ufenthalt noed choenne verlaengere.
 
Am naechschte Tag haemmer naemli bereits muesse s'Auto in Vancouver abgaeh. So sind eus no wenigi Taeg bliebe, die schoeni Stadt az'luege und Abschied z'naeh vonere tolle Region: British Columbia. In Vancouver haend mir viel Ziit im Stanley Park verbracht, sind mitm Sightseeingbus es paarmal durch d'Stadt gfahre, haend eus Chinatown aglueged und au die weltbekannti "steam clock / Dampfuhr" gseh. Ja,und scho simmer im Bus gsesse, wo eus id USA sprich nach Seattle bringt. Wie's eus dete so ergange isch, choend ihr da nahlese. Zerscht aber gahts no zu de Kanada-Bilder….