Mexico

24. – 31. August 2005 / Mietwagerundreis Yucatan – Mecixo

Nachere letschte und churze Nacht in San Diego hemmer muesse am Morge frueh uf de Flughafe, es isch bereits scho i euses letschte Land uf eusere Traumreis gange: Mexico. Via Dallas sind mir daenn in Cancun glandet. De Flug selber isch sehr guet gsi, eifach bitsli speziell: in Dallas hemmer wegere Verspaetig fascht de Aschluss verpasst und dete hends daenn im Flueger d'Vorhaeng abmontiert, ufs WC het mer nume in Begleitig vom Kabinepersonal doerfe und ufm Gang umestah isch allgemein noed erlaubt gsi. Alles Sicherheitsvorkehrige.
 
Nume churz nach de Akunft in Cancun sind mir daenn bereits i eusem chline, hellblaue Truckli (ohni Radio, ohni irgendwelche Schnickschnack wo mire us vorallem vo de US-Autovermietige gwoehnt gsi sind, aber defuer mit Klimaalag) unterwegs gsi. S'Auto isch so winzig gsi, dass mir zerscht Angscht gha hend, dass es fuer euses Gepaeck gar noed langed. Aber zum Glueck het alles sogar im Kofferruum choenne verstaut werde.
 
Nach oeppe 1,5h umekurve hend mir im Zentrum vo Cancun euses 1. Hotel gfunde: Radisson Hacienda. Wow, so viel Luxus sind mir eus also gar nueme gwoehnt!!! Es grosses Hotel mit Pool, riesige Zimmer, verschiedene Restaurants etc. etc. het eus erwartet. Mir sind fascht chli ueberfordered gsi demit… :-)     Noed umesuscht wird Cancun au "Mexico's biggest Resort-Hotel" gnennt. Alles isch uf Tourischte (vorwiegend us de USA) abgstimmt, eis riesigs Hotel, Bars, Diskotheke, Shoppingcenter etc.  nachm andere. Cancun selber gfallt eus absolute noed, aber de 23km langi Playa mitm schneewiise, fine Sand isch traumhaft… Wenn nume die viele Hotelbunker noed waehred….
 
Am naechschte Tag hend mir bereits eusi Rundreis im Yucatan gstartet. Da en Uszuug devo:
 
Vo Cancun us Fahrt entlang de Riviera Maya nach Tulum. D'Mayastaett hoch ueber de Karibik het eus total fasziniert! Die ehemaligi Hafestadt thront uf ere 12m hoeche Felseklippe direkt ueber em stahlblaue, karibische Meer. Wills aber unglaublich heiss gsi isch, sind mir bereits nach 2h Besichtigung wieder wiiter gfahre. Tulum isch uebrigens die einzigi Baute vo de Mayas direkt am Meer.
 
Ufm Weg vo Chetumal nach Palenque sind mir vorallem durch Waldgebiet gfahre, ca. 250km lang. Das Gebiet isch immer wieder chli bewohnt, meistens wohned d'Mensche in ganz eifache Holzhuettene mit Strohdach. Steihueser gits da nume i de groessere Ortschafte. Damit mer uf de Strasse – die groessere sind sehr guet usbaut, die chlinere ziemlich volle Schlagloecher – noed zu schnell chan fahre, hends immer wieder riesigi "bumps" anegstellt. Bi dene wartet meistens Fraue oder Chind wo mit Fruecht oder Getraenk chli oeppis wetted verdiene. Ufem Weg nah Palenque hend mir d'Mayastaett Kohunlich aglueged. Die liegt total abgschiede im Urwald und strahlt oeppis ganz ruhigs us.
 
Uebernachtet hend mir daenn in Palenque. Am fruehe Morge hend mir die mystischi Staette besichtiged. D'Huegelchettene um Palenque sind mit dichtem Regewald bedeckt, und zmitzt ine befindet siech s'klassische Maya-Zentrum. Architektur und d'Bildhauerkunst sind wunderschoen ghalte. Mir hend geimnisvolli Tempel und Graeber aglueged und sind am Namittag daenn no zu de Agua Azul gfahre. De Weg det ane het eus ueber grueni Huegel, chlini Doerfli im Wald ine und durch einsami Gebiet gfuehrt. D'Farbe vo dene bekannte Wasserfaell sind wunderschoen und definitiv en Bsuech wert. S'einzig schade isch, dass es au da ueberall chlini Chind oder au Fraue hend wo oeppis wend verkaufe und teilwiis e Absag eifach noed akzeptiered. Aber da chan mer fascht noed boes si, d'Tourischte sind fuer vieli Mensche de Lebensunterhalt. Au wenns wuerkli teilwiis nervig isch….
 
Wiiter ischs vo Palenque us zu de charmante Kolonialstadt Campeche gange. Sehenswert isch da vor allem die herzigi, restauriertei Altstadt. D'Hueser sind rosarot, gelb, gruen, hellblau, violet. Gseht eifach total speziell us. Zmitzt i dene bunte Farbe ine trohnt e riesigi Chile. Wills eus aber viel z'heiss gsi isch, haend mir usserd de Altstadt nueme meh vo Campeche aglueged. So sind mir bald wiiter zu eusem Tagesziel Uxmal gfahre.
 
De Abig in Uxmal (sprich "Uschmal") isch einmalig gsi: mir hend d'Moeglichkeit gha, um e Ton- und Liechtvorstellig ide beidruckende Staette z'gseh. Dezue isch eus d'Gschicht bzw. d'Sage vo dere Mayastaett verzehlt worde. Isch schono es speziells Erlebnis, so fascht im dunkle a some Ort d'sitze und de Stimme rundume us de Luutsprecher zuezlose…  Am naeschte Morge hemmer eus das Ganze denn no bi Tagesliecht aglueged und d'Pyramide vo de Wahrsager, s'Nonneviereck und de Gouverneurspalast besichtiged. Aschluessend simmer as Meer gfahre, gnauer nach Celestun. Mitme chline Boot ufm Fluss ischs ines wildwuchsigs Dschungelrevier gange. Es het sehr wenig Tourischte gha und mir hend zeme mitm Bootsfahrer und sinere chline Tochter Celia e Privattour gha. S'Gebiet wo die rosafarbene Flamingos wohned isch total idruecklich. Mir hend au no choenne en versteinerete Wald und es einzigartigs Mangrovedickicht bestuune. Und wieder eimal isch eus de Gedanke durch de Chopf, dass es eifach wunderschoen isch, was d'Welt alles zo z'buete het!
 
Gege Abig sind mir i de Hauptstadt vom Bundesstaat Yucatan acho: Merida. Mir hend dete s'lebendige Triebe gnosse, sind fein go Znacht esse (natuerlich mexikanisch) und hend die leider viel zu churzi Ziit wo mir I dere spannende Stadt gha hend u.a. au mitere romantische Kutschefahrt durch s'Zentrum verbracht. Merida wird uebrigens au "Weisse Stadt" gnennt, will ihri Baute us hellem Kalkstei bestoend.
 
Ja, und scho staht de letschti Tag uf eusere Rundreis bevor. Fuer eus ganz sicher s'Highlight: Chichen Itza, mit de weltbekannte Pyramide von Kukulcan. Mir hend durch die Mayastaette choenne e Reis durch verschiedeni Ziitepoche mache, de Kriegertempel, de Ballspielplatz und s'Observatorium bestuune. Durch das dass mir bereits am fruene Morge dete gsi sind, hend mir alles no choenne besichtige bevor d'Sunne hoech am Himmel gstande und somit sehr heiss gsi isch.
 
Via de Cenote Dzitnup (Hoehle) sind mir ueber verschiedeni Landstrasse mit riesige Locher bi starchem Raege wiiter gfahre und hend euse definitive letschti Ufenthaltsort uf de fascht einjaehrige Reis um d'Welt erreicht: Playa del Carmen!
 
1. – 8. September 2005 / Badeferie Playa del Carmen
 
Eusi letschti Wuche vom "time-out" hend mir vorallem ame traumhafte , fascht menscheleere Sandstrand verbracht. Euses Hotel Las Palapas isch en Traum gsi und mir haend eus unglaublich wohl gfuehlt! Mir sind – soferns noed gregnet het – am Strand gsi, sind am Abig durch s'Zentrum gschlendered, haend s'mexikanische Esse nomal gnosse und haends eus eifach so richtig guet gah lah! Mir sind bi Vollmond um Mitternacht im karibische Meer go bade, haend ame wunderschoene Hochziit am Strand choenne zueluege (neiii, mir selber sind da  noed beteiliged gsi….), haend en Flug mitm Paraglider ueber de Ort und das wunderschoene Meer choenne mache, haend "muesse" Jetski fahre (damit mir ufs Boot usecho sind wo de Paraglider gstartet isch) und eus langsam aber sicher uf d'Heireis vorbereitet. Als Abschluss simmer no in Park Xcaret, wo eus e unvergesslichi Show ueber s'Land Mexico und de verschiedene Staate, de Taenz und de Lieder definitiv verzaubered het! S'Mexico-Fieber het also au eus packt!!
 
Da gahts no zu de Bilder vo eusem gsamte Mexico-Ufenthalt!
 
Und scho isch euse Abflug sprich de Heimflug nach Zuerich via Miami vor de Tuer gstande. Mir hend eus kein bessere Abschluss also die 2 Wuche in Mexico choenne vorstelle. D'Rundreis und de Badeufenthalt sind fuer eus eifach perfekt gsi!
 
E unvergesslichi, einmaligi und eifach fantastischi Ziit i eusem Lebe isch z'End:
Mir sind überzügt, mir werded beidi no sehr lang devo zehre und eus au im Alltag wieder a dene tolle Erlebnis erfreue. Mir erinnered eus immer wieder a wahr gwordnigi Reisetraum und wer weiss, viellicht tüemer bald scho de nächschti verwürkliche.... :o)

"Träume nicht Dein Leben - lebe Deinen Traum"