Hongkong

11. November 2005 /  Hongkong

Jetzt simmer bereits es paar Taeg da in Hongkong und stelled fescht, es gfallt eus je laenger je besser. D'Stadt selber und au s'sogenannte "nuet-mache". Mer haend also scho richtigs Ferie-Feeling :-)
Vor de Abreis am letschte Samstig isch naehmlich no ziemli viel los gsi.. gar nuet vo wege langwiilig werde wenn mer nueme am schaffe isch. Aber mer hend euses Ziel, d'Abreis, ohni irgenwelchi spezielli Zwueschefaell erreicht und uuuh Freud gha a all dene wo am Flughafe cho sind goge winkewinke mache.
De Flug isch sehr guet gsi und au die 10.40h sind sehr schnell verbi gange, wie im Flug halt, hihi. Sehr ruhig und mer hend recht guet choenne schlafe.
 
Bis jetzt hemmer scho viel gseh. Uf Hongkong Island de Victoria Peak (DE Ussichts-Punkt, werdets daenn bi de Bilder gseh), Aberdeen (ehemaliges Fischerdoerfli, the real Hongkong), daenn au no de groeschti freistehendie Buddha uf de Welt, de isch 26m hoech. Verschiedeni Tempel hemmer au scho aglueged, de Kowloon Park, de Nacht-Markt bi de Tempel-Street. Mit de Star Ferry simmer vo Hongkong Central uf Hongkong Island uebere gfahre (duured nu es paar Minute, wunderschoeni Ussichte uf de Hafe). Und gester Abig hemmer es einmaligs Liecht/Spektakel vo de Skyline gseh, inklusive klassischer Musig ade Hafepromenade vo Kowloon.
Mer hend so viel "Entdeckigs-Drang", dass mer eifach nume umelaufed, und laufed und laufed. Und zwuescheddure mal anehoeckled, d'Rueh gnuessed, dureschnuufed und eus alueged und findet "willkomme i eusem Traum, er isch am Realitaet werde".
 
Vorletschti Nacht hemmer es chlises Intermezzo gha mit de Polizei. Am Morge am 5.15h (nachdem mer endlich mal es paar Stund hend choenne dureschlafe), klopfts wie wild a eusi Tuere. Luuti Stimme rueffed energisch "open the door, open the door, police here". Mir sind natuerli fascht stande im Bett. Hend daenn nach kurzer Ueberlegig doch ufgmacht und tatsaechlich: 3 Polizischte vor de Tuere wo eusi Uswiise hend welle gseh. That's it! Kei Erklaerig, nix. Am Morge hemmer denn zerscht scho gmeint, segi nume en Traum gsi, aber s'Froelein vom Guest House het sich entschuldiged und gmeint, sie hebed im ganze Huus (und das isch riiiiiiesig) Kontrolle gmacht. Tja, zum Glueck nix weiteres....
 
Mier hend bis jetzt 2x s'Hotelzimmer zuegled und da wo mier jetzt sind, werde mer die letschte 3 Naecht vo eusem Ufenthalt i dere Stadt au bliebe. Mer hend im glichige Stock eifach ime andere Guest-House es total herzigs Zimmer gfunde, viel meh Platz als bim letschte Guest-House (mer hend ja kei riesigi Aspruech, aber knapp 7 m2 inkl. Badzimmer sind fuer eus beid inklusive Gepaeck scho chli knapp, und d'Klimaalag het en ziemliche Laerm gmacht).
 
Hongkong isch e wunderschoeni Stadt. Sehr suuber, gepflegt. Die oeffentliche Verkehrsmittel (vorallem s'Netz vo de U-Bahne) sind au fuer blondi Europaerinne liecht z'verstah, d'Luet sind sehr nett und loehnd sich au noed grad us de Rueh bringe, wenns kei Englisch choend und eus Tourischte mit Haend und Fuess muend oeppis erklaere. Ueberhaupt findet mier, dass es da trotz wuerklich sehr vielne Luet uf de Strass absolut noed hektisch zue und her gaht, egal i wellem Stadtteil zu wellere Ziit mier grad sind.
 
Sodeli, Bilder folged, sobalds mitm uploade klapped.