USA - Westen

 23. Juli - 24. August 06 / Rundreis Weschte USA
 
Aaaaalso, das haet wie folgt usgseh:
 
Vo Vancouver us simmer mitm Bus is ungwoehnlich heisse Seattle. gfahre. I dere Stadt ischs vorallem drum gange, e Kollegin vom Thomas z'treffe. So nebedbi hemmer daenn au no d'City chli aglueged, vorallem natuerli die bekannti Space Needle. Vo Seattle us ischs mitm Flueger nach San Francisco gange. Nach es paar Tag Sightseeing (Twin Peak, Golden Gate Bridge, Chinatown, Alcatraz, Lombard Street, Coit Tower, Fisherman's Wharf etc.) haet daenn euses Mietauto eus empfange (bi de Autovermieti isch dummerwiis no e Kreditcharte vo eus ligge bliebe, aber das isch e anderi Gschicht....).
Via em weltbekannte Wiigebiet  Napa Valley hemmer de Lake Tahoe erreicht. Vo dete us hemmer eus de Yosemite Nationalpark mit sine vielne Wasserfaell und em halbmond-artige Felse "Half Dome" aglueged. Am naechschte Tag simmer bi 43 Grad durchs faszinierende Death Valley gfahre. Das heisst zwar "Todestal", aber dete ischs trotz de extreme Trocheheit daenn absolut noed "tot". Euse naechschti Stopp isch d'Glitzer- und Casinostadt Las Vegas gsi. Dete hemmer 3 Naecht gschlafe (im Grund gno hemmer d'Nacht zum Tag gmacht und umgekehrt; also ganz nach em Gschmack vo de Petra *grins*) und sind wiiters via Zion Nationalpark, Bryce Canyon, Capitol Reef Nationalpark zum Arches Nationalpark. Um no meh vo dene vielne unglaublich iidrueckliche Landschafte und Naturwunder i dem Gebiet vo de USA z'gseh, haet eus eusi Route via  Monument Valley, Grand Canyon, Lake Powell und Lake Mead (Hoover Dam) nomal fuer ei Nacht nach Las Vegas gfuehrt (Petra und Thomas: Konzert Celine Dion, mit anschluessendem Casinobsuech...... Rita und Michael: faszinierendi Magic-Show). Vo det us simmer via Big Bear / San Bernadino nach Palm Springs gfahre. Det ischs z'Abig am siebni no 40 Grad gsi. Da haets natuerli nume no eis gaeh: ab in Swimmingpool!
 
Nach Palm Springs isch euses naechschti Motel zmitzt i de Welt vo de Stars und Sternli glege: Hollywood, also zmitz in Los Angeles. Nume grad e Querstrass vom bekannte Hollywood Boulevard entfernt hemmer es zahlbars Zimmer gfunde. Nachdem mer eus de Walk of Fame (mit dene vielne Sterne am Bode) in Hollywood selber, de Sunset Boulevard, Beverlly Hills, Rodeo Drive, Malibu, Bel Air und d'Universal Studios aglueged haend, ischs i die letschti Stadt vo eusere USA-Rundreis gange: San Diego!!
 
Die Luet wo eus guet kenned, wuessed, das die Stadt fuer eus e spezielli Beduetig haet! De Thomas haet mal 6 Moenet, d'Petra 3 Moenet da gwohnt. Und mitenand simmer au scho da gsi, aber damals simmer no keis Paar gsi... :-)
 
In San Diego haend mir de Rita und em Michael d'Stadt zeiged (Mission Beach, Pacific Beach, Coronado mitm bekannte Del Coronado Hotel, Seaport Village, Old Town, Balboa Park, Ikaufszentrum Horton Plaza, Point Loma etc.etc.). s'Sea World haet natuerli au noed doerfe fehle.
Und bald scho isch eusi 6-wuechigi Reis z'vierte beendet gsi und mir sind am Morge frueh am Flughafe gstande und haend eusi beide seniors (das isch da en liebe Usdruck fuer d'Luet ueber 60gi) verabschiedet. Trotz de sehr hoeche Sicherheitsvorschrifte wegem plante Aschlag vom Flughafe London-Heathrow us isch s'ichecke und au d'Passkontrolle problemlos ueber d'Buehni gange.
 
Da warens nur noch zwei... die letschti Ziit isch sehr schnell verbi gange. D'Rita und de Michael haend eus fuer 6 Wuche i eusem Traum begleitet und durch das vieli Idrueck selber choenne uebercho und mithei naeh. Es isch e tolli Ziit gsi, und mir haend unglaublich Freud, dass mir das alli mitenand gmacht haend!
 
Tja., und jetzt hoeckled mir, Thomas und d'Petra, die letschte Taeg no in Suedkalifornie, gnuessed chli s'nuet mache, tuend edie viele Idrueck  vo de letschte Wuchene verarbeite und planed no de Reschte vo eusere letschte Destination vo eusere Reis: Mexico. Das wird e Rundreis im Yucatan si, und daenn no es paar Taeg Badeferie in Playa del Carmen. Mier wuessed ja noed, waenn mir s'naechschte Mal id Ferie choennd... :-)